TURA: Re·anggipa bilsio, South West Garo Hills a·jani Garobadha jolo Chenga Benga Mela-ko ong·atanio me·chik bi·sa sakgniko drae til·ekanirangko knana man·ahani gimin ia changode ia mela-ko ong·atanio iandakgipa a·selrang ong·taijana gita rakgipa niamrangko ra·gatchina A·chik State Peoples Front (ASPF) Garobadha regional unit, South West Garo Hills a·jani Superintendent of Police (SP)-ko didiataha.
“Chenga Benga Mela-ko ong·atanio joarangko kal·atna permission-rangko ra·enga ine chinga knasona man·aha indiba iandake joarangko kal·atanichi ia manianio so·sojengjeng ong·anirangko ra·bana kenchakengani gimin ia manianio joa kal·anirangko chinga raken jegalenga. Re·anggipa bilsiosan Chenga Benga Mela-ko ong·atanio me·chik bi·sa sakgniko jinma til·ekdraaniko an·ching knana man·ahani gimin ia changode ia mela-ko ong·atanio rakgipa niamrangko ra·gatchina chinga nangnikenga,” ine ASPF Garobadha regional unit-ni dilgiparang, South West Garo Hills a·jani SP-na sedoatgipa chittio parakataha.
ASPF Garobadha unit-ni parakatani gitade, ia biaprangona Rohingya-rangba napsrukbaani cholrang donga ine National Commission for Protection of Child Rights (NCPCR)-ba jajrengchakaniko janapatahani gimin ia Chenga Benga Mela-ko ong·atanio mikrakbatna aro niamrangko rakbatatna nangchongmotenga.
Ia Chenga Benga Mela-ko ong·atanio, joarangko kal·na on·jachina, manichakgipa biap gimikon nanga gita sipairangko donchina, ong·gija dakgipa kamrangko champengna gita CCTV camera-rangko done nirikkichina, ia mela-o bak ra·na re·baenggipa aro badingenggipa pilakkon name nichengchina, ia mela-o me·chik aro bi·sarangko nambate nirok sandina man·na gita help desk, emergency response team-rangko done, awareness campain-rangkoba ong·atchina ASPF Garobadha regional unit, South West Garo Hills a·jani SP-ko didiataha.
Re·anggipa bilsio Cheng Benga Mela-ko ong·ataniona re·anggipa me·tra sakgniko baditaba sak manderang, drae til·ekaha aro ia a·selni bidingo police-rang gimik saksku manderangko rim·ahachim.
 |
ReplyForward
|
