Garo Labour Corps Cenotaph-ko rikpilanio Minister-ni dilanichi committee-ko songa

TURA: Tura-ni Babupara jolo donggipa Garo Labour Corps-ni Cenotaph-ko rikpiltaianio Cabinet Minister-ni dilanichi committee-ko songchina Garo Hills-ni dingtang dingtang dolrang dabitokahani gimin a·dok sorkari, a·dokni Cabinet Minister Marcuise N Marak-ko chairman dake, dingtangmancha committee-ko songe on·angaha.

A·dokni Chief Secretary DP Wahlang-ni seachi parakatani gitade, ia committee-ko Cabinet Minister Marcuise N Marak, chairman ong·e dilanggen aro ia committee-o Arts & Culture-ni Director I Majaw Member Secretary ong·e, Meghalaya Assembly-ni Deputy Speaker Timothy D Shira, Arts & Culture Department-ni Secretary R P Marak, GHADC-ni Chief Executive Member Albinush R Marak, Semford B Sangma, Charmingstar N Sangma (Retd MCS), social activist Sengrak D Marak, MPSC Member Babynna T Sangma, ABDK-ni President  Beryl B Sangma, Narcylina Marak, Don Bosco College-ni Principal Father Januarius S Sangma, Dr. Ramona M Sangma, Bijoy A Sangma, Bernita R Marak, Dr. Angela W Ingty aro GHADC-ni Executive

Secretary Sam Ricardo R Marak, membor-rang ong·skagen.

Una agreba ia committee-o, dingtang dingtang dolni dilgiparang, chong·motan Dr. Merril N Sangma, Sume G B Sangma, Sabina K Sangma, Dr. Cintholina B Sangma, Gredalson Ch Momin, Coffercil R Marak, Giribala G Momin, Lyndon Ch Momin, Balkarin Ch Marak, Cherian Ch Momin aro Happiniush M Sangma-ba membor ong·gen ine a·dokni Chief Secretary parakataha.

Ia committee-ni daitorangko talate on·angengon, ia committee, A·chikrangni daka rikanirango nangchakegipa biaprangko namdapatna ja·kurangko de·anggen aro iandake A·chikrangni gamchatgipa biaprangko ripinge rakkina ja·kurangko de·anio agan-ku·pattianirangko on·anggen ine Chief Secretary parakataha.

Ia kamo nangchakegipa pilak dolrang baksa ia committee, agan-chanchirimanirangkoba dakanggen aro ia committee, man·a dipet ta·raken report-ko a·dok sorkarina on·anggen ineba Chief Secretary parakataha.

Ia Cenotapha-ara, a·gilsak gimikni skanggipa dakgrikanio (First World War), an·tangtangko on·kange France a·songona re·anggipa pagitchamrangko gisik ra·na aro mande ra·na tarigipa cenotaph ong·achim aro bilsiantian July-ni 16 tariko Garo Hills-ni manderang, ia biapo jinma tom·enba, pagitchamrangko gisik ra·e mande ra·pilskaaniko dakrongengachim ine nikna man·a.