WILLIAMNAGAR: East Garo Hills a·jani ning·o donggipa Mangsang Moronga A·king Nokmani a·arangko West Khasi Hills-ni manderang ra·sekdrana jotton ka·enga ine Mangsang jolni Nokma-Sordarrang aro Mangsang jolni nangrimgimin NGO-rang, Garo Hills Autonomous District Council (GHADC)-ni Chief Executive Membor (CEM) Albinush R Marak aro Deputy CEM Nikman Ch Marak-na badi ka·doangaha.
GHADC-na uamangni badi ka·anio parakatani gitade, Moronga a·king Mouza No. IV-60-ni bang·a a·arangko km 10-na batpile West Khasi Hills-ni manderang ra·sekdraenga aro uamangni ra·sekdrana jotton ka·enggipa songrangara Nongkingkil, Rengka aro Mogru songrang ong·a.
Indake uamangni ia songrangko ra·sekdrana jotton ka·enganichi jolo songdongenggipa manderang neng·nikanirangko man·enga maina uamang bajar anti cha·a changantian kajina gilenga aro dingtang dingtang nokni nanganina jekai, an·cheng ro·ong uandakgiparangnikoba niamgri kajina gilenga aro bagan bari dakenggiparangonikoba kajina gilenga ine songni manderang aro dingtang dingtang dolrang parakataha·
Iani bidingo, jolo songdongenggipa manderang, jinma tom·e chanchirimenba Moronga a·kingni Nokmako ra·galna gita tik ka·angaha aro gital Nokmako songe on·china GHADC-ni CEM-ko uamang mol·molangaha ine jolni nangrimgimin NGO-rang parakataha.
Indake ong·engon, iani bidingo GHADC-ni CEM aro gipin dilgiparang, da·o Good Friday-ni ja·man a·king Nokmako okamate golpochengna ku·rachakaniko on·ataha ineba songni Nokma Sordarrang aro nangrimgimin NGO-rang parakataha.
