‘Chonchongipa a·dokrangko dabianio maming ong·ja’: Hek
SHILLONG: Chonchongipa a·dokrangko dabidilanichi gitcham Union Minister aro Lok Sabha-ni gitcham Speaker Purno A Sangma sagi, India a·songni salgro salaram jolo songdongenggipa jatrangko bak dakna jotton ka·aha ine matnangani ja·man Manipur a·dokni gitcham Chief Minister N Biren Singh aro Meghalaya a·dokni Chief Minister Conrad K Sangma-ni gisepo adita jera ra·grikanirangko nikna man·angahaon, ia jegrikanio Bharatiya Janata Party (BJP)-ni dilgipa aro a·dokni Cabinet Minister AL Hek-de bak ong·pana jechakatskaaha.
Singh aro Sangma-ni jegrikanio bak ong·pana jechakatengon, ian BJP aro NPP-ni gisepo jegrikani ong·ja ine Hek, talataniko on·angskaaha.
“A aro B-ni gisepo jegrikanio anga an·tangde mamingkoba aganpana nangani dongjawa maina angade manderangna aro Meghalaya a·dokna dangdike on·enggipa mandesa ong·aia,” ine Hek aganaha.
Ian BJP aro NPP-ni gisepo jegrikani ong·ja indiba iani bidingo ua mamingkoba aganpana nangani dongja ine a·dokni BJP Minister aganaha.
Chonchongipa a·dokrangko dabidilanichi salgro salaram jolko bak dakna jotton ka·a ine Purno A Sangma sagiko matnanganina aganchakaniko on·angskaengon, chonchongipa a·dokrangna dabianio ua an·tangde maming ong·gijaniko nikja ine Hek parakataha.
“Garorangba dingtang Garoland-ko nangnikenga aro Khasirangba dingtang Khasiland-ko nangnikenga indide chongipa a·dokna dabianiora maia ong·gijani donga? Chongipa a·dokna dabianio maiba ong·gijani dongama? Anga an·tangde maming ong·gijaniko nikja,” ine Hek aganaha.
Gitcham Union Minister aro Lok Sabha-ni gitcham Speaker Purno A Sangma sagini chonchongipa a·dokrangna dabianiko Singh-ni matnange agangipani bidingo sing·anina Hek, ia kattarangko aganaha.
“Changsao PA Sangma sagi, jatrango pangchake, salgro salaram jolko chonchongipa a·dokrangona pe·na gita ku·rang on·ahachim aro ian an·chingni a·songo ku·mong nangrimanina kenchakna nangani ong·a. Da·alo an·ching apsan daken Manipur-o ong·enggipa obostarangko nikenga,” ine adita salrangna skangsan Manipur-ni gitcham Chief Minister N Biren Singh, X social media-o Lok Sabha-ni gitcham Speaker PA Sangma-ko matnange seatahachim.
 |
ReplyForward
|
