MENDIPATHAR: Budbar walni 11:30 bajimango, North Garo Hills a·jani Mendipathar bazaar-o, police-rangni re·roroe nirokengmiting somoio gari bolsa ta·rakbee re·baenba, sipairangko salpakna jotton ka·aha aro indakmiting somoio gariko neng·takatna ine CRPF sipai saksa an·tangni silchidareko jako ra·on, ia silchidare maibakae goa gita dakaha aro ia gario gadoenggipa mande saksani ja·ako guli nangeaha.
Police-rangni kobor on·ani gitade, Budbar walo, AS-01AM 7750 gari bolsa, Mendipathar bazar-o donggipa bibra gita ta·rakbee re·baaha aro Pushpa Cloth Store sambao donggipa CRPF checkpoint-ona sokon, ia gari ua biapo dongsoenggipa sipairangko salpakna jotton ka·ahani gimin uamangoni saksade bile katna nangaha.
Ia gariko police-rang champengna jotton ka·on, gariko salgipa driver, ua biaponi sale katna accelerator-ko ga·pretataha. Indakmiting somoio ua biapo donggipa CRPF officer saksa, gariko neng·takatna ine an·tangni ra·bitgipa AK rifle-ko cock ka·on, ua gari rang·san ua biaponi sale katna jotton ka·aha aro uandaken CRPF officer-ni ra·bitenggipa rifle, maibakae goa gita dake, ia gario gadoenggipa Neobirth R Marak-ni ja·ping samgnikon guli nangeaha.
A·sel ong·ani ja·man saknaa man·gipa mandeko aro garini driver Sengrim K Sangma, sanna aro porikka ra·na gita Mendipathar PHC-ona ra·angaha aro porikka ra·e nion, uamang sakgnian chuko ringa ine ma·sina man·aha.
Guli nanga man·gipa mandeko nambate sanna gita hospital-ona watataha indiba gari salgipa mandekode chu ringe gari salani gimin aro sipairangko salpakna jotton ka·ani gimin police-rang rim·aha.
Uamangni garioniko police-rang, chu botolrangkoba bang·en man·aha ineba u·iataha.
