Somoi done kamko matchotatchina AHAM nangnikenga
TURA: Tura-ko Winter ba Second Capital songchina Garo Hills-ni dingtang dingtang dolrang dabitokengani gimin a·dok sorkari, pilak political party-rangkon bak ong·ate cholrangko am·sandina gita dingtangmancha committee-ko songe on·angaha.
Tura-ko Winter Capital songanichi Garo Hills-oba a·dokni gipin biaprango gitan apsan namroro silroroaniko aro tang·doaniko ra·bana man·gen ine Garo Hills-ni dingtang dingtang dolrang, Tura-ko Winter Capital songchina dabitokengachim.
A·dokni Chief Secretary DP Wahlang-ni u·iataniko on·angani gitade, ia committee-ko a·dokni chief minister ba uni songe on·gipa minister-chi dilanggen aro ia committee-na dilgipa sakgnini biming on·atchina pilak political dolrangkon u·iataha.
Ia committee-ni mongsonggipa kamrangara, Tura-ko Winter Capital songani cholrangko sandina, Tura-ko Winter Capital songanio namgni aro namgijanirangko nina, dingtang dingtang dolrang aro manderang baksa agangrike bon·kamao report-ko sorkarina on·anian ong·gen ineba Chief Secretary u·iataha.
Ia committee-ni chanchirimanirango bak ra·na gita ia kamo nangchakegipa pilak sorkari department-rangkon okamgen ineba Chief Secretary u·iataha.
Indake ong·engon, Tura-ko Winter Capital songani bidingo chanchirimna aro cholrangko sandina gita committee-ko songe on·ahani gimin A·chik Holistic Awakening Movement (AHAM), a·dok sorkariko mittelpilataha indiba ia committee, somoi done kamrangko ka·skana nanga ine an·tangtangni nangnikaniko parakataha.
“Tura-ko Winter Capital songchina dabianiara ru·uta bilsirangonin ong·enga aro Garo Hills-ni manderangona sorkarini kamrangko sepangbatatna nangnike dingtang dingtang dolrang, iana ku·rang on·enga. Ia committee-ni dakna nanggni kamrangko chinga ra·chaka indiba kamko ru·utatchae dongjana gita ia committee-ni kamrangko matchotatna somoiko donna nanga,” ine AHAM-ni president Georgeprince Momin parakataha.
