TURA: Darengre-oni Durabanda songona rama tarianiko name nirokjaengani a·sel ia ramako niam gita tarijaenga ine Nokrek Area Development Committee (NADC) parakatenba, iani bidingo PWD (Roads) Tura North Sub-Division No. 1-ni assistant executive engineer aro uni ning·o kam ka·enggipa official-rangni kosako West Garo Hills a·jani Deputy Commissioner-na badi ka·doangaha.
NADC-ni joint secretary Salseng N Marak-ni parakatani gitade, Darengre-oni Durabanda songona dakanggipa ramara a·brirang, dingtang dingtang songrang aro manderangni game ge·e cha·enggipa biaprang gita dakanggipa rama ong·e, bang·a songni manderangan ia ramao pangchake janggi tangenggiparang ong·a aro songni manderang, ia rama gitan an·tangtangni game ge·e man·gipa bosturangko palna sim·na jakkalasan ong·aigija pilak kamrangnan ia rama gitasa re·ruratokpaengachim.
Ia ramara kutcha ramasa ong·ani gimin da·o gita wachini somoi sokahaode ramarang re·na namsrangjae, sagipa manderangko hospital-rangchi salangon, sagipa manderang ramaon sichipronga aro skul-college re·enggipa aro office-rango kam ka·enggipa manderangba da·o gita wachini somoirangode rama namsrangjae, re·na man·rongtokja ine NADC parakataha.
Indake ong·engon, ia ramako tarichina gita ru·utbea bilsirangna ia jolo songdongenggipa manderangni dabianiko sorkari knachakenba, ia ramako ‘all weather road’ ba pilak karirangon choligipa rama dake tarina krorni kror tangkarangko chame on·atahachim ine Marak parakataha.
“Ia ramako ‘New Nano Technology Soil Stabilisation’ minggipa cholo pangchakesa tarina nangani gimin ramako tarianio saksa kamni gimin ma·sigipa official-kosa nangachim indiba chingni nikani gitade, ia ramako tarianio department-ni technical official-rang grisa, contractor-rangni labour-rangsa an·tangni ska gita tarienga. Iani bidingo chinga PWD (Roads) Tura North Sub-Division No. 1-ni Assistant Executive Engineer aro uni ning·o kam ka·enggipa official-rangko, nirokchina gita didiahachim indiba uamang darangba kamrangko nirokena gisiko nangjaha. Uni gimin maibakae ramako taria namjani a·sel manderang sina nanggenchimode, garirang a·sel ong·na nanggenchimode ba ramarang ta·raken nosto ong·na nanggenchimode ia official-rangkon dai channa nanggen,” ine NADC-ni joint secretary parakataha.
 |
ReplyForward
|
