EGH-ni songo PMGSY ramako taria matchotja ine GHYS matnanga

WILLIAMNAGAR: East Garo Hills a·jani Rongbinggre songo Pradhan Mantri Gram Sadak Yojana (PMGSY) ramako taria matchotgija galchipaha ine Sukrobar salo, Garo Hills Youth Solidarity (GHYS) matnangatenba, iani bidingo sandirokenba nanga gita ja·kurangko de·china sorkari official-rangko didiataha.
GHYS-ni president Endick Marak-ni parakatani gitade, songadam nokadamrango donggipa manderangna re·a doanirangko altubatatna gitasa ma·mong sorkari, PMGSY scheme-ko a·bachengate on·ahachim indiba iandake songni ramarangko matchotgija galchipaniara manderangni namgnina chamatgipa tangka paisarangko jakkalsretanisa ong·enga.
“Ia ramako baditaba bilsirangna skangan matchotna nangahachim indiba ramako matchote tarigija galchipahani a·sel da·o ia ramao buringrangsa dikkripskaengaha. Ia ramako matchotgija galchipaniara songni manderangna neng·nikanirangko ra·baanisan ong·aigija, manderangni namgnina chamatgipa tangka paisarangko jakkalsretaha ine mesokaniba ong·a. Manderangni namgnina chame on·enggipa tangka paisarangko jakkalanio parak ong·ani dongjaengani a·selan iandakgipa obostarang ong·enga aro iako GHYS raken jegalenga,” ine Marak parakataha.
Ia ramako matchotgija galchipahani gimin ta·raken sandirokanirangko dakatchina aro ia kamko ka·gipa contractor-rangni kosako rakgipa ja·kurangko de·chinaba GHYS didiataha.