Sorkari, railway project-ni fund-ko Railway Ministry-na on·atpilna chanchia

SHILLONG: Byrnihat-Shillong railway project-ko dondipata gitan dakaijok, maina Meghalaya sorkari, project-na a·ako brena on·atgipa tangka ba fund-ko Railway Ministry-na on·pilatna chanchienga.
Sorkari, project-na on·gipa kror 209.37 tangkako ta·raken Ministry-na on·atpilna chanchiaha, jena lekkani kamrangkode a·bachengatjok.
Railway project-na a·ako brena watgipa tangkako Ri Bhoi district-ni Deputy Commissioner-ni jako batanggimin bilsi 2017 March 30 tariko pakwatahachim.
Indake ma·mongni tangkako on·atpilchina ge·etaniko man·e a·dok sorkari, Khasi Hills-ona railway-ko ra·baanio maidakgipa namgni ba namgijanirang donga, iako sandina gita committee-ko songaha.
A·dokni pressure group, niamgri napsrukani batna kene district-ona railway-ko ra·bana sorkariko on·jaha. Bostu salgipa railway line-mangmangkon ra·bana on·jaha.
Uandake pressure group-ni railway project-ko dontongataonin Tetelia Byrnihat railway line-ko a·bachengnan man·jaha.
Ri Bhoi Byrnihat-oni Assam Tetelia-ona km 20.5 railway line-ko tarina kror 496-ko koros ka·na tik ka·ahachim. Ia project-o Meghalaya-ni 2.5 km biapsan napaigenchim aro project-ko Byrnihat-o bon·atgenchim.
Da·ode Meghalaya sorkari, railway line-ni gimin chanchirimna committee-ko songaha, sorkari, ru·utesa ia mamlao mikrakaha.
Songsul a·dokrang jekai-Manipur, Mizoram aro Sikkim-ode ta·raken railway sokgnok.