SHILLONG: Ia bilsini Secondary School Leaving Certificate (SSLC) porikkao pass ka·anggipa pilak chatro chatrirangnan biaprangko on·na man·na gita a·dokni pilak secondary skulrangkon higher secondary-ni gadangona ra·dona a·dok sorkari tik ka·angaha.
Re·anggipa Sonibar salo parakatgipa SSLC result-rangni bidingo janapatengon, “Ia bilsini SSLC porikkao 87.1 percent pass ka·ahani gimin ia bilsio sak 30,000-mangni gita chatro chatrirang, Class XI-o admission ra·na tikkeltokgnok. Uni gimin je skulrangan higher secondary section-rangko chalaina sikengachim, uandakgipa pilak skulrangnan chinga no-objection certificate (NOC)-rangko on·anggen,” ine a·dokni Education Minister Rakkam A Sangma parakataha.
Education Minister-ni aganani gitade, pilak sorkari secondary skulrangkoba higher secondary-ni gadangona ra·doatgen aro a·dokni pilak higher secondary skulrangon chatro chatrirangko rimnapchina sorkari didigen.
Ia chang SSLC porikkao jillarango donggipa skulrangsan ong·aigija songadam nokadam aro pilak skulrangan nambate dakaha ine janapatengon, ia pilak chatro chatrirangnan apsan cholrangko on·na nanggen ine Sangma aganaha.
Skulrangna uamangni kamni kri a·dok sorkari, grade-rangko on·na miksongenga ineba Education Minister parakataha.
Ia bilsio pass ka·gipa chatro chatrirangna admission-rangko on·anio sorkari neng·nikanirangko chagrongnaba gnang ine janapatengon, chatro chatrirangna biaprangko on·na man·na gita mitam higher secondary skulrango morning class ba pringni class-rangkoba a·bachengatna nanggen ine Education Minister aganaha.
Pilak skul aro college-rangkon da·o ta·rakede admission-ni kamrangko a·bachengkujachina ge·etgen ine janapatskaengon, ia bilsiosa skanggipa changna SSLC porikkani result-ko pangna on·rongana bate jagni skang on·aha ine Sangma aganaha.
Pilak skul aro college-rangon academic session-ko May ja bijangchioni apsan a·bachengchina sorkari nangnikenga ineba ua aganaha.
Ia bilsio SSLC porikkani result-rang namkalbatahani gimin MBOSE-ko mittelpilangskaengon, porikkarango name dakna man·jaenggipa skulrangko sorkari sandimanaha ine Education Minister parakataha.
“Ia skulrangko chinga re·anggipa bilsio re·ange nieaha aro uamangna pilak nanga dakchakanirangko on·na ku·rachakaha. Uamangko mikkangchi rakbate kam ka·angkuchina chinga didigen,” ine Sangma aganaha.
Indake ong·engon, Meghalaya a·doko higher secondary section donge nambatgipa skulrangde admission-ni kamrangko a·bachengskaaha ine nikna man·enga.
Koborko on·ani gitade, Shillong songjinmani mitam skulrango, admission-ni kamrangko Sonibar salon matchottokaha aro Class XI-ni academic session-ko April jani bon·angachibara a·bachengna parakatmanaha.
 |
ReplyForward
|