KHADC election-rango A·chikrang puonna man·na nangja: KHNAM

Shillong: Khun Hynniewtrep National Awakening Movement (KHNAM), Khasi Hills Autonomous District Council (KHADC)-o Voice of the People Party (VPP)-ni dilenggipa minggittam point-rangko janape segipa memorandum-ko Sombar salo on·aha.
Dolsa KHNAM delegation, Sombaro Chief Executive Member (CEM), Shemborlang Rynjah-ko grongenba uamangni minggittam dabianirangko segimin kingsa memorandum-ko on·aha.
KHADC CEM-ko grongani ja·mano koborni manderangna aganengon, KHADC election-rango Khasi ong·gijagipa gipin jatrangni puonaniko champengna gita KHADC-ni (Constitution and the Procedure and Conduct of Business) Rules, 2018-ni Rule 128-ko taridapchina gita didiaha ine KHNAM working president Thomas Passah aganaha.
KHADC election-rango Khasi jatkosan puonna chol on·aichina gita niamko dakchina gitaba ua EC-ko didiaha.
Passah indakeba aganaha je KHADC a·jarango songdonggipa A·chikrangko puonna on·na nangja, maina uamangni namgnirangko Garo Hills Autonomous District Council (GHADC)-an chel·chakenga aro ripingenga.
Indake ong·engon, iani bidingo KHNAM ku·pattianirangkoba on·na ku·rachakaha, maina ian niam gita ong·ani gimin uamang ma·sichakaigen, Passah aganaha.
Unomitingo Ri-Bhoi district-ni ning·ogipa Thain Marwet jolrango donggipa songrango A·chikrangsa Rangbah Shnong-rang ong·engani gimin ua jajrengani kattarangkoba aganaha.
Ia manderang Chief Minister Conrad Sangmakoba grongenba uamangna official appointment letter-rangko on·china gita Hima Mylliem-ko mol·molchina aganaha ineba Passah matnangaha.
Passah indakeba jaski ote aganaha je, Khasi jatonisan Rangbah Shnong-rang ong·na man·aigen ine Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007-o rongtalen sea donga.
Unigisepon, Act ba niamko pe·giparangni kosako FIR ka·china gitaba ua KHADC-ko didiaha.
“Iana an·ching da·on rake kam ka·na nanggen ong·jaode ja·manchi an·tangtangan an·tangtangko Rangbah Shnong dakgiparang bang·rorogen. Da·on simsakjaode ja·manode nanggrikaona sokgen” ineba Passah mikrakataha.