SHILLONG: Mongolbar attamo, Assam a·dokoniko drugs ba pekatgipa samrangko West Khasi Hills a·jaona ra·baengmiting somoio mande sakgittamko Anti Narcotics Task Force (ANTF)-ni sipairang, rim·na man·aha.
Police-rangni u·iatani gitade, pekatgipa samrangko badingenggipa manderangni bidingo koborko man·soenba ANTF-ni sipairang, Nonglang songo donggipa Langpih-Nongstoin ramao nirikkianiko dakenba Assam a·dokchipakni re·baenggipa ML-06A 1450 gari bolsako champengsoaha aro ja·mano ia garioniko mande sakgittamko, heroin aro ganjarang baksa rim·na man·aha.
Rim·ako man·gipa manderangara, New Nongstoin-oni bilsi 29 ong·gipa Bryan Kharbani, bilsi 25 ong·gipa Donkerry Rynthathiang aro Pyndengrei Mawkhmahwir songni bilsi 31 ong·gipa Morningstar L Rngaid ong·a.
Ia manderangoniko ANTF official-rang, gram 15 ong·gipa heroin sam, syringe-rang, gram 130 ong·gipa ganja, mobile phone aro adita tangkarangkoba man·aha.
Iani bidingo ANTF-ni official-rang Nongstoin Police Station-o mokordoma ka·doangaha.