TURA: Aadhar card-rangko ration card-rang baksa link ka·jani gimin PM Vishwakarma Scheme-ni namgniko ra·na gita galgipa dorgastorangko den·galanina Bharatiya Janata Party (BJP)-ni West Garo Hills district committee, Commerce & Industries-ni commissioner-na badi ka·e sedoataha.
BJP WGH district committee-ni secretary Peterjob Sangma-ni u·iatani gitade, ia scheme-na uni galgipa dorgastokoba den·galaha aro iandake district magistrate-ni dorgastorangko den·galaniara, ia scheme-ni ning·o on·gimin niamrangko bilgriatasan ong·aigija ia scheme-o pangchake janggi tangenggipa bang·a manderangnan neng·nikaniko ra·baani gitaba ong·enga.
“PM Vishwakarma scheme-ni official website-on ration card-ko link ka·anide manderangni skaniosa ong·aia ine talen janapani gnangchim indiba Aadhar card-rangko ration card-rang baksa link ka·jani gimin dorgastorangko den·galaniara manderangna jajaaniko aro mongsongbate maming cholrang dongjae, iandakgipa ma·mong sorkarini scheme-rango pangchake janggi tangenggipa manderangna dukniko ra·baani ong·aha. Uni gimin manderangna ia PM Vishwakarma scheme-ko nambate on·na man·na gita iani bidingo ning·tue am·sandianirangko dakchina aro ia scheme-na nanganirangko talatchina didienga,” ine Sangma, Commerce & Industries-ni commissioner-na badi ka·doanganio janapataha.
