SHILLONG: Ia bilsini Secondary School Leaving Certificate (SSLC) porikkani result-rangko parakatani ja·man Chief Minister’s Impact Guidebook-rangko ra·galpilchina aganahani gimin Bristibar salo, a·dokni Education Minister Rakkam A Sangma, Voice of the People’s Party (VPP)-ko jegalataha.
CM Impact Guidebook-rangko ra·galpilchina dabiahani gimin VPP-ko jegalatengon, je manderangan textbook-rangni dakchakanirangko nangja, uamangde an·tangtangni ki·taprangko Umiam warichi galatna man·aigen indiba hajalni hajal chatro chatrirang, porikkako pass ka·na gita iandakgipa dakchakanirangko nangenga ine Sangma parakataha.
Guidebook-rangko ra·gate on·anichi sorkari, SSLC porikkako pass ka·na altubatate on·aha ine matnanganiko jegalatengon, altue pass ka·atnade sorkario miksonganirang dongja aro ia guidebook-rangara chatro chatrirangna ku·pattianirangko on·aigipasan ong·e porikkako pass ka·na dakchakaniko on·gipasan ong·aia ine Education Minister aganaha.
Ia bilsini SSLC porikkako pass ka·gipa hajalni hajal chatro chatrirangna biaprangko tikatani bidingo janapatskaengon, a·dokni pilak secondary skulrangon class-rangko ba morning class-rangko a·bachengatanichi iandakgipa skulrangko higher secondary-ni gadangona ra·dona sorkari miksongenga ine Education Minister parakataha.
Ia bilsini SSLC porikkao chatro chatrirang bang·bate pass ka·ahani gimin dingtang dingtang dolrang, CM Impact Guidebook-rangko ra·gatanina sorkariko matnangtokengachim ine nikna man·a.
Iani bidingo a·dokni Chief Minister Conrad K Sangma-ba aganchakaniko on·angengon, ian Civil Service, IIT, IIM, NEET aro GMAT gita dakgipa susagrikani porikkarango gitan chatro chatrirangna gitcham question-rangoniko poraina cholrangko on·ani gitasan ong·aia ine a·kangatahachim.
Ia guidebook-rangara chatro chatrirangko porikkana tarisamsona dakchakgipasan ong·aia ine janapatengon, “Ia booklet-rang uamangko IAS officer-rangde ong·atjawa aro uamang rakbate poraina nangkugen. Ia booklet-rang dongaiani gimin chatro chatrirang gimikkon man·aigen ia katta ong·ja,” ine Sangma talataniko on·angahachim.
“Manderang jekoba ong·gija aganchina angade uarangna maming aganchakani dongjawa. Anga an·tangde skulo poraienggipa bi·sani gitasa niate kamko ka·aha aro anga kusi ong·a da·alo dingtanganiko nikna man·aha,” ineba Chief Minister aganaha.