Tangka cha·giparangni kosako mokordoma ka·anina, songni Nokma aro gipinrangko doka

Tura:West Garo Hills ajani Tikrikilla assembly concstituency-ni ningo ong·gipa Bhangarpar songni Nokma, Mottior Hussain-ko doka-satanina aro songni manderangoniko  PMAY-G housing scheme-ni bidingo tol·e tangkarangko gile ra·enganina, saksni manderangni kosako,  re·anggipa April-ni 6 tariko Bhogularbitha (Nidanpur) police outpost-o mokordoma ka·aha.
Bhogularbitha (Nidanpur) police outpost-o Hussain-ni mokordoma ka·anio parakani gitade, ia a·sel ong·aniara Bhangarpar songni sepangjolo donggipa LP Skul-ni PWD rama-o saksni manderang uko aro gipin sakgni, Samimul Islam aro Noor Islam-koba chadrapaha. Hussain-ni aganani gitade, ua salo reporter saksa songona re·baenga inako kobor man·soe uko grongna re·angachim. Indiba ja·mano ua reporter-ko, dos dakgipa saksni manderangsa Block Office-oni watatako  man·e job card donggiparangoniko,  Awas Plus 2024-ni ning·o man·enggipa (PMAY-G) Scheme-ni bimungo tol·e tangkarangko ra·enga ine badi ka·gipani bidingo am·sandienggiparang ine aganaha. Indake kobor ra·timgipa baksa golpogrikengani gisepon, kajia golmal ong·enganiko knae obosta ong·gipa biapona re·angoara, Samimul aro Noor Islam-ko doka satenganiko nikeaha aro uko champengna dakmittingosa saksni manderang Hussain-ko chadrape uamangni kosako songni manderangoniko tole tangka gile ra·enganina badi ka·gipa uan ine, rakgipa goldikchi uko doka sataha ineba Hussain Police-rangna parakaha. Indake gnigipa changna uni mokordoma ka·anio janapgimin gitade, maming pangchakani ba ge·etanigri job card donggipa songni manderangoniko Awas Plus 2024 housing scheme-na bimung segatna ine drae tangka 2000-ko gile ra·enggiparang jerangan, Bhangarpar songni Taher Ali aro  Pabomari songni Nokma, Mojibor Ali-ni kosako songni manderangni jegale agananiko man·soe iani bidingo janapate Block Development Officer-na March-ni 18 tariko badi ka·doatahachim. Una agreba, ia 2000 tangkarangko gamjaode housing scheme-oniko bimung den·galgen ineba manderangko kenataha. Hussain-ni aganani gitade tangkarangko gile ra·enggipa sakgni manderang, Village Employment Council ba PMAY-G administration-o maming bak donggiparang ong·jachim  aro Mojibor Ali-ni Bhangarpar songni nanggipa kamrango bak ong·paaniara niamni a·palo ong·a  ineba ua janapataha.