SHILLONG: West Garo Hills a·jao mitam sorkari official-rang aro songo noko kamrangko ka·dilenggipa manderang, Pradhan Mantri Awas Yojana – Gramin (PMAY-G) scheme-ko ra·na gita songni manderangoniko tangka gile ra·enga ine a·dokni Bharatiya Janata Party (BJP) matnangataha.
BJP-ni state vice president aro Tura-ni MDC Bernard N Marak-ni parakatani gitade, PMAY-G scheme-ara kangal cholgrirangna nokrangko rikna gita sorkarini on·enggipa scheme-sa ong·achim indiba West Garo Hills a·jani badiaba badiaba biaprango mitam official-rang, ia scheme-ni ning·o nokrangko geo-tag ka·na gita sakprakonikon gong 2000-mang ka·e gile ra·skaengachim.
“Ia kamo gram sevakrang aro VEC secretary-rangba jak donga. Je songrangon kangal cholgrirangoniko iandake tangka gile ra·engachim, uandakgipa block-ni BDO-rangna anga u·iatmanaha,” ine Marak parakataha.
Niam gri tangka gile ra·aniko champengna uamang ta·raken ja·kurangko de·gen ine ku·rachakaniko on·atengon, cholgri ong·gipa songni manderangko dakchakna aro tangka gile ra·enggipa manderangni kosako mokordoma ka·na gita BJP, helpline-rangko kuligen ine BJP-ni state vice president parakataha.
“Songni manderang cha·bokako man·jana gita chinga helpline-rangko kuligen aro PMAY-G-ni bimingo tangka gile ra·gipa gram sevakrang aro VEC secretary-rangni kosako FIR-rangko ka·gen,” ine Marak parakataha.
Iandake PMAY-G-na tangka gilani bidingo badi ka·doangani ja·man Bhangarpar songni dilgipako badiaba dolni manderang chadrapahachim ine nikna man·a.
Indake ong·engon, Bhangarpar songosan iandakgipa obostarang ong·enga ong·ja aro gipin biaprangoba apsan obostarangan ong·enga ine Marak parakataha.
“Namjabatgipa bakde, iandakgipa obostarangni bidingo mitam sorkari official-rangba ma·siengachim indiba uamang an·tangtangan ia kamrango jak on·paenga. Bang·a songrangon iandake VEC secretary-rang, songni manderangko ka·mikkenate tangkarangko gile ra·enga indiba official-rang maming ja·kurangko de·jaenga,” ine Tura MDC parakataha.