SHILLONG: India a·songo Kristianrangko dokkol ka·anirang batroroengani gimin Tura-ni Lok Sabha MP Saleng A Sangma, ma·mongo BJP-chi dilenggipa NDA sorkariko matnangataha.
India a·songo Kristianrangko dokkol ka·e roanirang batroroenganina an·tangni suk ong·gijaniko parakatengon, Kristianrangko dokkol ka·aniara namen namjabatroroenga aro salantian Kristianrangni kosako dokkol ka·aniko changgnide nikna ba knasona man·rongenga ine Congress MP parakataha.
January jao ming 65, February jao ming 65 aro March jao ming 76 case-rangko man·chape April jaona kingking Kristianrangni kosako dokkol ka·ani ming 196 case-rangni bidingo Violence Monitor Report 2025-o am·sandie segatani giminba Sangma mesoke on·angaha.
Manipur a·doko bang·bea gilja nokrangko nisie galani giminba Tura MP, an·tangni suk ong·gijaniko parakataha.
India a·songo dingtang dingtang jat aro toromrangni meli nangrime janggi tanganiko BJP-chi dilenggipa NDA sorkari nisie galenga ine matnangatengon, iandake a·songo songdongenggipa chonchongipa jat aro toromrangni kosako ong·gija dakanirangko champengna gita ku·cholsan ong·e ja·ku de·china Sangma, Opposition dolrangko didiataha.
Iandakgipa kamrangni kosako ku·cholsan ong·e chadengchina gitaba ua a·songni manderangko didiataha.
