SHILLONG: Meghalaya a·doko, mongsongbate Garo Hills-ni badiaba badiaba biaprango ma·mong sorkarini scheme-rangko ra·na gita official-rang aro Village Employment Council (VEC)-rang, songni manderangoniko tangka ra·enga ine matnanganirang ong·katengani gimin ma·mong sorkarini scheme-rangko manderangona sokatanio nambate kamrangko ka·china Tura-ni Lok Sabha MP Saleng A Sangma didiataha.
Iandakgipa scheme aro program-rangni bidingo Deputy Commissioner (DC) office-rang, manderangna talate on·anirang dongjaenga ine janapatengon, ma·mong sorkarini on·enggipa namgnirangko ra·ani bidingo songni manderangna agan-talate on·na gita district aro block ge·antion awareness program aro workshop-rangko ong·atjringchina Sangma ku·pattianiko on·angaha.
Sorkarini scheme-rangko on·anio official-rang ba gipinrang ong·gija kamrangko ka·enga ine nikgenchimode, uandakgipa official aro manderangni kosako rakgipa ja·kurangko de·china gitaba Congress MP didiataha.
Scheme-rangko ra·na tangka paisarangko dabienga ong·ode sorkari office-rango badi ka·china aro iandakgipa official-rangni kosako rakgipa ja·kurangko de·china gitaba Sangma didiataha.
Iandakgipa scheme aro program-rangara manderangni namgnina sorkarini ra·gate on·gipa scheme aro program-rangsa ong·a ine janapatengon, ma·mong sorkarini on·enggipa scheme-rangko ra·anio songni manderang maiba neng·nikanirangko man·enga ong·ode, DC, SP aro gipin official-rang nanga gita ja·kurangko de·na nanga ine Tura MP parakataha.
West Garo Hills a·jao mitam sorkari official-rang aro songo noko kamrangko ka·dilenggipa manderang, Pradhan Mantri Awas Yojana – Gramin (PMAY-G) scheme-ko ra·na gita songni manderangoniko tangka gile ra·enga ine adita salrangna skangsan BJP-ni state vice president aro Tura-ni MDC Bernard N Marak parakatahachim.
PMAY-G scheme-ara kangal cholgrirangna nokrangko rikna gita sorkarini on·enggipa scheme-sa ong·a indiba West Garo Hills a·jani badiaba badiaba biaprango mitam official-rang, ia scheme-ni ning·o nokrangko geo-tag ka·na gita nokdang ge·prakonikon gong 2000-mang ka·e gile ra·skaenga ine Marak matnangatahachim.
 |
ReplyForward
|