TURA: Meghalaya a·dokni bangbang ong·e dongenggipa Lower Primary (LP) aro Upper Primary (UP) skulrango Meghalaya Teachers Eligibility Test (MTET) pass ka·e dongenggipa skigiparangko ta·raken kamo ra·china didie, South Garo Hills a·jani social activist Greneth M Sangma, a·dokni Education Minister Rakkam A Sangma-ko didiataha.
Iani bidingo social activist Greneth Sangma, Education Minister-na email gita chittiko sedoataha aro ia chittio uni parakatani gitade, MTET pass ka·e dongenggipa skigiparang, kamrangko man·ningjaengani a·sel, mongsongbate bilsi re·angroroengahani gimin neng·nikanirangko chagrongna nangtokengachim.
“Ia skigiparang, nanga gita qualification-rang donge MTET-ko pass ka·giminrang ong·genchimoba da·onan kamo donatako man·tokkujaengani a·sel neng·nikanirangko chagrongna nangtokengaha. Ia skigiparangko ta·rake kamo ra·jagenchimode mitam skigiparangde dongimin bilsi batanggnok, unode uamang sorkari skulrango kamrangko ka·pana chol ong·jawaha,” ine Sangma, Education Minister-na email gita sedoatgipa chittio parakataha.
A·dokko tarianio skigiparangni ka·enggipa kamrangni gimin janapatengon, MTET pass ka·gimin skigiparang kamrangko ka·pana man·na gita ia skigiparangko ta·raken bangbang ong·e dongenggipa kamrango donatna nanga ine Sangma, Education Minister-ko didiataha.
