Garo Hills-o gipin jatrangna a·a patta on·aniko dontongchina ACHIK dabia

TURA: Garo Hills-o gipin jatrangna, mongsongbate Tribal ong·gijagipa manderangna gital a·a pattarangko aro gitcham pattarangko gital dake tarie (renew) on·kuengani a·sel, ian A·chik a·songni a·arangko gimaatani cholrang ong·enga ine A·chik Conscious Holistically Integrated Krima (ACHIK) dol parakatenba, Garo Hills-o gipin jatrangna a·a patta tarie on·aniko aro renew ka·aniko dontongchina Garo Hills Autonomous District Council (GHADC)-ko didiataha.
Iani bidingo ACHIK Krima Council-ni gita GHADC-ni Deputy Chief Executive Membor Nikman Ch Marak-na sedoatengon, Autonomous hill district-rango songdongenggipa Tribal-rangni a·arangko aro identity-ko warachakna gitasa Indian Constitution-ni Sixth Schedule-ko on·ahachim aro GHADC-an ia bilrangko nitimgipa ong·e Tribal-rangni a·arangko chel·chakanio daito donggipa ong·achim ine ACHIK dolni dilgiparang parakataha.
“Indake ong·genchimoba Garo Hills-o Tribal ong·gijagipa manderangna da·oba dontonggija a·a pattarangko on·engkua aro dongsogimin pattarangko renew ka·e on·kuenga ine chingna nikna man·enga. Iandake Garo Hills-o gipin jatrangna a·a pattarangko skatang on·enganiara A·chikrangni a·arangko gimaatna kenchakna nangani aro Sixth Schedule-o on·gimin bil aro niamrangko pe·ani gitaba ong·enga,” ine ACHIK Krima Council-ni dilgiparang parakatenba, gipin jatrangna a·a patta on·aniko aro patta renew ka·e on·aniko dontongchina GHADC-ko mol·molataha.