SHILLONG: Garo Hills-ona uni re·bae nianganio sorkarini mongsongbatgipa scheme-rang chu·sokgipa ong·enganiko ua nikangna man·aha ine a·dokni Deputy Chief Minister Prestone Tynsong a·kangataha.
Tynsong-ni aganani gitade, Garo Hills-o sorkari scheme-rangsan chu·sokgipa ong·enga ong·ja indiba pilakni gitan tom·tomanikoba man·engaha.
Dingtang dingtang department-rang baksa tom·e chanchirimanio official-rang una, Pradhan Mantri Gram Sadak Yojana (PMGSY), National Highways & Infrastructure Development Corporation Limited (NHIDCL), Central Road Fund (CRF), Rural Infrastructure Development Fund (RIDF) aro State Plan-ni tangka paisarangko tarienggipa ramarangni bidingo talatanirangko on·ataha ineba Deputy CM parakataha.
Tynsong-ni parakatani gitade, bang·bata ramarangan matchotna siengaha aro mitam ramarangkode ia bilsini bon·na skangan aro mitamrangkode 2026 bilsio matchotna ka·dongenga ine tom·anio official-rang, una talataniko on·ataha.
Ia project-rangko ka·anio dingtang dingtang neng·nikanirangko chagrongna nanggenchimode dongimin somoiko ja·rikahani gimin ua dingtangmancha engineer-rangkoba mittelpilangaha.
Rama jal·lang gri ong·e dongenggipa dam 750-na baten songrangko nangdimeatna gita da·o sorkari, PMGSY IV bakko a·bachengatna siengaha aro iana Detailed Project Report (DPR)-ko a·dokni PWD tariengaha ineba a·dokni Deputy Chief Minister aro PWD (Roads) Minister parakataha.
