MANGSANG: East Garo Hills a·jani Mangsang jolo donggipa Nongkongkil aro Morongga songrangko nieani ja·man, ia jolrango ga·akgipa biaprangko KHADC-ni a·kangdrana jotton ka·engani gimin A·chik State People’s Forum (ASPF) dolba raken jegalataha.
Koborko on·ani gitade, ASPF dolni membor-rang, re·anggipa April 17 tariko, ia song damgniona re·anga songni manderango sing·sandie ra·angaha aro ia songrangara, East Garo Hills a·ja ning·on ga·aka ine ma·sina man·aha.
“Ia songrangko KHADC, niam gri kangdrana jotton ka·enga indiba chingni ia songrangona re·ange songni dilgiparang baksa agangrikon, Mogru, Nongkongkil aro Morongga songrangara Garo Hills Autonomous District Council (GHADC)-ni ning·osa ga·akachim ine ma·sina man·aha,” ine ASPF-ni general secretary Bernita Marak parakataha.
Iana skang Mangsang jolo donggipa dingtang dingtang dolrang aro manderangba, GHADC-ni ning·o ga·akgipa biaprangko km 10 batpile KHADC a·kangdrana jotton ka·enga ine jegaltokahachim.
“Skangonin ia songrang Garo Hills ning·on ga·aka aro iana pilak nanga lekkarangba donga. GHADC-ko a·bachengaonin ia songrango donggipa manderang, GHADC election-osa pu·ontokpaenga,” ine Marak agankuaha.
Ia songrangko skangonin Garo Hills ning·on wa·reng salmanaha aro da·o ia songrangko KHADC-o man·angani kattarang nakatjawa ine janapatengon, ia songrangko jedakeba Garo Hills ning·on donna gita uamang chel·chakaigen ine ASPF parakataha.
“Meghalaya a·dokko man·chengaonin ia jolrango Khasi aro Garorang meli nangrime janggi tangbaenga indiba da·o ia songrangko Khasi Hills ning·o napatdrana jotton ka·aniara ia jatgnini gisepo an·chi pari nikani aro dinggrikaniko ra·baani gitasa ong·enga,” ASPF mikrakataniko on·angaha.
Mikkangchi jatgnini gisepo iandakgipa a·selrang ong·jana gita ia biaprangni bidingo ma·sisretgrikaniko ta·raken namatchina gita ASPF, a·dokni Chief Minister Conrad K Sangma-koba didiataha.
