SHILLONG: Ia bilsini Secondary School Leaving Certificate (SSLC) porikkao pass ka·gipa chatro chatrirangna biaprangko tikate on·na man·kujaengoba, Class XI-ni academic session-ko re·baenggipa June 1 tarik dipet a·bachengna man·naba gnang ine a·dok sorkari ka·dongskaenga.
Ia bilsini SSLC porikkao batanggimin bilsirangona bate bang·bata chatro chatrirangan pass ka·na man·tokahani gimin indita sak chatro chatrirangna, dingtang dingtang higher secondary skulrango aro college-rango admission on·na gita sorkari neng·nikanirangko chagrongna nangengani gimin Sombar salo a·dok sorkari, iani bidingo tom·e chanchirimanirangko dakangaha.
School Education & Literacy-ni Director Banteilang J Kharsandi-ni parakatani gitade, a·dokni dambri sorkari secondary skulrangko higher secondary-ni gadangona ra·doatchengna ia tom·anio tik ka·angaha.
Una agreba, je skulrangan higher secondary-ni gadangona ra·doatna nangnikengachim, uandakgipa skulrango dingtang dingtang stream-rangna admission form-rangko on·china gitaba a·dok sorkari, pilak DSEO-rangnan ge·etaniko on·ataha.
“Chatro chatrirangni admission ra·aniko nienba, da·o dongsoenggipa sorkari higher secondary skulrango gital stream-rangko ra·gatna nanggenma nangjawa ukode tik ka·anggen,” ine Kharsandi aganaha.
Iandakgipa skulrango gital stream-rangko ra·gatgenchimoba, skigiparangkoba ra·na nangengani gimin sak 8 ba sak 9 dongaigipa chatro chatrirangna skulo gital stream-ko ra·gatgenchimode indin ong·gramaigen ineba ua aganaha.
“Uni gimin badiaba sorkari higher secondary skulo science stream-ko ra·gatgenchimoba sak 30 ba sak 40 chatro chatrirang donggenchimosa chingona proposal-ko on·atna man·gen aro uni ja·man chinga Cabinet-ni approval-ko ra·chenge, pilak DSEO-rangna ge·etaniko on·na man·gen,” ine Education official parakataha.
Koborko on·ani gitade, Baghmara-o morning shift-rangko kulina miksonganiko bang·a manderangan namniktokenga aro Baghmara Govt Higher Secondary School baksana Capt Williamson Sangma Memorial College-o sak 350-mangni gitade chatro chatrirangna biaprangko on·na man·gen.
