TURA: Meghalaya Public Service Commission (MPSC)-ni gital chairperson-ko seokanio Garo category-oniko nichanggale, Khasi-Jaintia jatonikon seoktaina tik ka·aha ine A·chik State People’s Front (ASPF) dolba parakataha aro iani bidingo nipiltaichina a·dokni Chief Minister Conrad K Sangma-na sedoataha.
Iani bidingo salsa skangsan A·chik Conscious Holistically Integrated Krima (ACHIK) dolba, a·dokni Chief Minister-na sedoatenba, MPSC-ni gital chairperson-ko seokanio name nipiltaichina didiatahachim ine nikna man·a.
ASPF dolni Chief Minister-na sedoatgipa chittio parakatani gitade, da·o kamoni watangenggipa MPSC-ni chairperson-ba Khasi-Jaintia gadangonin ong·achim aro da·o gital chairperson-na seokako man·enggipa mandeba Khasi-Jaintia gadangonin ong·a.
“Meghalaya State Reservation Policy 1972-o Khasi-Jaintia aro Garorangko dolgni dake chanenba, dolpraknan 40 percent biapko kange donmanaha aro iano pangchaken MPSC-ni membor-rangko, mongsongbate chairperson-koba dolgnini gisepo sualgrike seokani ong·achim. Indake ong·genchimoba, MPSC-ko a·bachengaonin chairperson-ni kamko Khasi-Jaintia gadangoni changsku jako ra·aha aro Garorangonide changsnisan jako ra·kuengpiti. Ian Reservation Policy-o dongimin niamko pe·ani ong·a aro da·o changsataie MPSC-ni chairperson-na Khasi-Jaintia gadangoniko seokna ja·ku de·aniara ia dolgnini gisepo bak rengsi sualgrikaniko pe·ani ong·enga,” ine ASPF-ni general secretary Bernita R Marak parakataha.
Chairperson-ni kamko Khasi-Jaintia-Garo jatgittamni gisepo sualgrike on·na nanga ine mitam official-rangni agananiko jegalatskaengon, Reservation Policy-on Khasi aro Jaintia jatkode dolsan gita chanahani gimin iandake ja·ku de·aniara kraani ong·ja baksana ra·chakna amgijani ong·gen ine ASPF-ni general secretary parakataha.
Reservation Policy-ko name ja·rikna gita 2022 bilsini April 5 tariko Meghalaya High Court-ba, roster system-ko ja·rikchina ge·etaniko on·manaha ineba ASPF, gisik ra·atpiltaianiko on·angaha.
“Uni gimin MPSC-ni gital chairperson-kode Garo category-oniko seokskachina chinga raken dabienga aro iako ja·rikjagenchimode ian A·chikrangna on·gimin bak rengsiko ra·seka gita ong·enga,” ine Chief Minister-na sedoatgipa chittio ASPF-ni general secretary parakataha.
Ia mol·molaniko knachakjagenchimode ASPF, niamo pangchake jingjengatanirangko dakna draatako man·gen ineba ua mikrakataniko on·angaha.