MENDIPATHAR: Mendipathar-o kulienggipa PepsiCo karkanao, National People’s Party (NPP) MLA-rangni recommend ka·atenggipa candidate-rangkosan kamo rakkienga ine badi ka·anirangko man·soahani gimin Budbar salo, Rongrong-ni All India Trinamool Congress (AITC) MDC Rinaldo K Sangma aro Meghalaya Pradesh Youth Congress (MPYC)-ni president Timjim Momin, ia karkanaona re·ange nieaha.
Ia PepsiCo karkanaona re·ange Rongrong MDC aro MPYC-ni president sing·sandianirangko dakon, NPP MLA-rangni didianiko man·e, uamangni recommend ka·atenggipa candidate-rangko kamo rakkina nangenga ine ku·chakatenba, mikkangchide iandake politician-rangni didianiko ra·gija, niam gita candidate-rangko kamo ra·gnok ine PepsiCo-ni official-rang, ku·rachakaniko on·ataha.
“Ia karkanani dingtang dingtang kamrangna NPP MLA-rangni recommend ka·atenggipa candidate-rangko aro party-ni manderangkosan kamo ra·enga ine Mendipathar aro Resubelpara-o songdongenggipa manderangni badi ka·anirangko man·soenba anga da·alo, MPYC-ni president Timjim Momin baksa ia karkanaona re·ange sing·sandianirangko dakangaha,” ine Rongrong MDC Rinaldo Sangma parakataha.
Sangma-ni parakatani gitade, uamang ia karkanaona re·ange HR manager-ko sing·sandion, local MLA-ni didianiko man·e uamang ia karkanao uamangni recommend ka·atenggipa candidate-rangkosa kamo rakkiengachim indiba da·o mikkangchide iandake darangnaba mikkang niteani gri kamrangko on·gnok ine HR manager, uamangna ku·rachakaniko on·ataha.
“Ia karkanao pilak kamrangkon North Garo Hills a·jani manderangna skang on·china chinga dabiaha aro mikkangchi iandake politics-ni gita darangnaba kamrangko on·jachina chinga mikrakataniko on·aha. Ia niamko ja·rikjagenchimode chinga uamangni kosako rakgipa ja·kurangko de·gen. PepsiCo-ni official-rangba ia karkanao kam ka·na gisik nanggipa manderangko, mongsongbate joltangni manderangko dorgasto galchina didienga ine aganataha,” ine Rongrong MDC parakataha.
