TURA: State Bank of India (SBI) Selsella Branch-o ru·uta somoirangonin Passbook update ka·ani machine aro Automated Teller Machine (ATM) nosto ong·e dongengani a·sel manderang neng·nikanirangko chagrongna nangtokenga ine A·chik Conscious Holistically Integrated Krima (ACHIK) dol parakatenba, ia SBI Branch-o Passbook update ka·ani machine aro ATM machine-ko ta·raken tarie on·china, branch manager-ko didiangaha.
ACHIK Council-ni parakatani gitade, SBI Selsella branch-o ru·uta somoirangonin Passbook update ka·ani machine aro ATM nosto ong·e dongengoba, ia ostrorangko bank official-rang taripile on·ningjaengani a·sel jolo songdongenggipa manderang, mongsongbate bank-o Passbook-rangko update ka·na nangenggipa aro ATM-ko jakkalenggipa manderang neng·nikanirangko chagrongna nangtokengachim.
Iani bidingo ACHIK Council-ni membor-rang, Mongolbar salo SBI Selsella Branch-ni manager-ko grongenba, jolo songdongenggipa manderangni namgnina ta·raken ia Passbook update ka·ani machine aro ATM-ko taripile on·china didiangaha.
ACHIK dolni mol·molaniko man·enba, SBI Selsella branch-ni branch manager, jasa jagnini gisepon ia Passbook update ka·ani machine aro ATM-ko taripile on·na ku·rachakaniko on·ataha ine u·iataha.
