Tura: Garo Hills a·jaoni 2024 bilsio Meghalaya Teacher Eligibility Test (MTET) pass ka·e Government LP skulo skigipani kamrangna senge dongenggipa chadamberangko ta·raken skigipani kamo rimnapchina, All Garo Hills Qualified Teacher Association (AGHQTA)-ni dilgiparang, a·dokni Education Minister Rakkam A. Sangma-ko adita salrangna skang Shillong songjinmao gronge, iani bidingo agan-golpogrikangan baksana memorandum-koba on·angaha.
AGHQTA-ni Education Minister-na sedoatgimin chittio janapatani gitade, 2023 bilsini December 1 tariko Meghalaya gimikoni sak 15,524 MTET porikkako seanggiparangoni, 2024 bilsini January 31 tariko sak 1,259 candidate-rang pass ka·tokahachim aro pass ka·aoni bilsi 1 ata batpilonan LP skulrango skigipani kamna senge dongenggiparangna gital dake mande rimnapaniko dakpilkujaengani gisepon gital MTET porikkako ong·ataina sienganiara ra·chakna man·gijani ong·a ine parakatenba, gital MTET porikkako ong·atna skangba gitcham pass ka·sogiminrangko kamo rimnape matchotatchengna nanga, maina mittam candidate-rangde bilsirang re·angan baksa ua kamna senge dongenggiparang cholko man·rikpajawahani gimin taraken District ge·antion LP skulo skigipani kamna rimnapaniko dakchina sorkario didiataha.
Iani bidingo golpogrikanganio, Education Minister-ni parakani gitade, skigipani kamna bangbang ong·e dongenggiparango mande rimnapaniko dakna gita Roster System-ko kam ka·an matchotkujaenga, aro kamna senge dongenggipa chadamberangni tikelana bate gadanggni mancha tikelengachim indiba ia kamko chu·sokatna man·kujaenga indiba man·a dipet jotton ka·enga ine Sangma aganataha.
