SHILLONG: Bi·sarangna naljokaniko on·na man·a gita pilak skulrangon niamrangko ra·gatchina Meghalaya State Commission for Protection of Child Rights (MSCPCR)-ni Chairperson Agatha K Sangma didiatenba, bi·sarangna naljokgipa songsalko ong·atanio ku·cholsan ong·e kamko ka·china, skigiparangko, dingtang dingtang institute-rangko aro jolo songdongenggipa manderangko mol·molangaha.
Dingtang dingtang skulni dilgiparang, agan-ku·pattie on·giparang, skigiparang, chatro chatrirang aro Faith Foundation-ni membor-rang baksa tom·bimonganio ua jinmana aganprakangengon, 2021 bilsio National Commission for Protection of Child Rights-ni on·gimin niamrangni bidingo MSCPCR-ni Chairperson, agan-talatanirangko on·angaha.
Ia niamrangara skulrango bi·sarangko naljoke rakkina dongimin niamrangan ong·a ine janapatengon, bang·bata skulrangan ia niamrangni gimin ma·sitokkujaenga ine Sangma aganaha.
“Ia niamrangde ku·pattianimangmangsan ong·jaha maina Supreme Court-an ia niamrangko a·songni pilak skulrangon ra·gatchina ge·etaniko on·manaha,” ine Sangma aganaha.
Ia niamrango pangchake skul nokrangko mangrakgipa ong·e, rongtal an·tale, wa·alrangoni naljokgni ong·e, chirangko nengrae man·na aro rongtalgipa babilsirang baksa rikna nanga ineba Sangma talataniko on·angaha.
Me·chik bi·sarangna somoi nikani somoirango maming nirok sandianirang dongjani a·selsa me·chik bi·sarang, skulrango poraianirangko dontongtokenga ine janapatskaengon, pilak skulrangon, me·chik bi·sarangna dingtang toilet-rangko donchina MSCPCR-ni Chairperson didiangaha.
Bi·sarangna an·seng baljokaniko on·na nangani gimin janapangskaengon, skulrango medical check-up-rangko aro tika su·anirangko ong·atjringchina Sangma didiangenba, February jao Deworming Day-ko manie skulrango samrangko sualanirang chu·sokgipa ong·ahani gimin mittele aganangaha.
Skulrango ripengskarangni sasti on·e roani, skigiparangni sasti on·ani aro uandake saknaatanirangko raken champengchina gitaba Sangma didiangaha.
Skulrango Parent-Teacher Association-rangko songna nangani giminba ia tom·anio MSCPCR-ni Chairperson didianiko on·angaha.