AMPATI: Sukrobar salo, South West Garo Hills a·jani dingtang dingtang biaprango donggipa skulrang, ‘Grow to be Healthy’ ba ‘An·seng baljokgipa ong·e dal·rorona’ ine pangchakaniko donenba, School Nutrition Garden (SNG) Day-ko maniangtokaha.
Ia salo SNG Day-ko manigipa skulrangoni Ampati-ni Hathisil Government Lower Primary School-ba damsa ong·a aro ia salko manianio, chatro chatrirang, skigiparang aro jolni dilgiparangba bak ra·angtokaha.
Hathisil Govt LP skulo ia SNG Day-ko manianio, State Reforms and Development Commission-ni Vice Chairman Clement G Momin, mongsonggipa sokgipa ong·e jinmana aganprakangengon, kitchen garden ba noktangtango me·su baganrangko dakna nangani gimin aganangaha.
“Kitchen garden-ko dakani ortoara an·ching an·tangtangna maming samgrigipa me·su samjakrangko man·anian ong·a aro iachi an·ching an·seng baljokgipa ong·e dal·rorona man·a,” ine Momin aganaha.
Ia program-ko ong·atanio, Implementation & Monitoring Committee-ni Director Jogodish Hajong-ba jinmana aganprakengon, gital me·su samjakrangko man·na gita bi·sarangna noktangtango ba skulrango me·su bagan dakaniko skie on·na nanga ine aganangaha.
Ia program-ko ong·atanio dongpae jinmana aganprakanggipa gipin manderangara, Ampati-ni Sub-Divisional School Education Officer (SDSEO) Emphul Ch Marak, Horticulture Development Officer Apojit Koch, Agriculture Development Officer Giting Ripamchi R Marak aro gipinrang ong·a.
