TURA: West Garo Hills a·jani Dalu Chandapara songo, Jal Jeevan Mission (JJM)-ni kamrangko matchotchipgija donani a·sel bang·a nokdangrangan chi pipe-rangko soke man·kujaenga aro ringani chirangko man·jae neng·nikanirangko chagrongna nangtokenga ine A·chik Dedicated Integrated Leaders (ADIL) Dalu regional unit parakataha.
ADIL Dalu regional unit-oni koborko on·atani gitade, Dalu Chandapara songo JJM-ni kamko matchotgija donani a·sel bang·a nokdangrangan chirangko man·tokjaenga ine badi ka·aniko man·soani ja·man ADIL Dalu regional unit-ni dilgiparang, songona re·ange songni manderang baksa agangrikangaha aro ja·mano iani bidingo RTI ka·e am·sandion, ia songo JJM-ni kamko 2023 bilsion matchotna nangachim indiba da·onan matchotgija donenga ine nikna man·aha.
“Uni gimin ia songo JJM-ni kamko matchotatna gita chinga PHE department aro ia songo JJM-ni kamko ka·gipa contractor baksa agangrikgen aro ia kamko chu·sokatjagenchimode chinga contractor aro official-rangni kosako rakgipa ja·kurangko de·anggen,” ine ADIL Dalu regional unit-ni dilgiparang parakataha.
