SHILLONG: Bristibar attamo, North Eastern Hill University (NEHU) Shillong campus-ni professor saksako kragija dake dokgipa manderangni kosako rakgipa ja·kurangko de·na aro campus-o skie on·enggipa manderang baksana chatro chatrirangna naljokaniko on·na gita a·dok sorkari, ku·rachakaniko on·angaha.
“Dos dakgipa manderangni kosako niamo pangchake ja·kurangko de·anggen aro NEHU-o naljokaniko on·china gita anga SP aro pilak police officer-rangna ge·etaniko on·manaha,” ine Sukrobar salo, a·dokni Deputy Chief Minister aro Home Minister Prestone Tynsong parakataha.
NEHU-o skigiparangna aro chatro chatrirangna maikai chel·chakanirangko on·na miksongenga ine sing·anina aganchakaniko on·angengon, “Chinga nanga gita chel·chakgiparangko donatmanaha aro iarangko anga chu·gimikko talatna nangnikjaenga. NEHU-o skigiparangna aro chatro chatrirangna naljokaniko on·aniara sorkarini daitoan ong·a,” ine Tynsong aganaha.
Ia a·sel ong·ani ja·man NEHU-o skigiparangni kenchaktokengani gimin janapatengon, “NEHU campus-o donggipa pilakkon jajrengjachina anga mol·molenga. Pilakni namgninan sorkari kamko ka·enga aro naljokaniko on·na gita chel·chakgipa sipairangko donatenga,” ine Tynsong aganaha.
Ia a·selni bidingo a·dokni Education Minister Rakkam A Sangma-ba suk ong·gijaniko parakatengon, “Ian namen ong·na kragijani ong·a aro dos dakgiparangna niamo pangchake sastirang donga. Adita somoirangna skangsan anga Shillong-ni SP baksa agangrikmanaha. A·doko mingnambatsranggipa university-o iandakgipa a·sel ong·aniara namen kragijani ong·a,” ine Sangma parakataha.
“Ia a·selni bidingo kakketko name ma·sie ra·chengkuna aro uni ja·man sorkari, nanga gita ja·kurangko de·anggen,” ine Sangma aganaha.
NEHU Shillong Campus-o Hindi department-ni professor ong·e kam ka·enggipa Dr Alok Singh-ko Bristibar attamo, NEHU Students Union (NEHUSU)-ni membor-rang, uni office ning·aon kragija dake dokaha ine koborko on·ahachim.
 |
ReplyForward
|
