SHILLONG: Ia changba Meghalaya a·doko UPSC Civil Services Examination (CSE)-ko pass ka·giparang dongtaijahani gimin mikkangchi ia porikkao chu·sokgiparang ong·na man·na gita ia chu·sokgijanikon ra·biani gita ra·skachina a·dokni chatro chatrirangko, a·dokni Education Minister Rakkam A Sangma didiangaha.
“Batanggimin bilsi 10 ba bilsi 12-na ia obostako an·ching nikna man·baenga aro ia changoba apsan dakgipa obostakon an·ching nikna man·taiaha. Indiba ian a·dokni chadamberangna ra·bianisa ong·na nanga,” ine UPSC CSE 2024-ni result-rangko parakani bidingo Rakkam aganaha.
Batanggimin bilsi 10-ni gisepo nikna man·baenga gitan ia bilsioba Meghalaya a·dokoni darangba ia a·songo rakbatsranggipa aro mingnambatsranggipa porikkao chu·sokna man·taijahachim.
Ia UPSC CSE-ara, Indian Administrative Service (IAS), Indian Police Service (IPS), aro Indian Foreign Service (IFS) gita dakgipa kamrangna candidate-rangko seokgipa porikka ong·a aro bilsiantian ia porikkako a·song gimikoni lakni lak chatro chatrirang serongengachim.
Batanggimin bilsirango chatro chatrirangni poraianirangko tang·doatna gita Meghalaya sorkari, dingtang dingtang scholarship scheme-rangko ra·gate on·an baksana gipin a·dokrango civil service-na coaching ra·na gita dakchakanirangko on·engoba da·o dipet a·dokoni ia UPSC CSE-o chu·sokgipa ong·na man·kujaenga.
Uandaken ia porikkao chu·sokna man·gijaniko an·tangtangna ra·biani gita ra·china aro krengbate poraichina a·dokni chatro chatrirangko Education Minister didiataha.
