TURA: West Garo Hills a·jani deficit skulrango bangbang ong·e dongenggipa skigiparangni kamko, Meghalaya School Service Rule 2025-ni niamrango pangchake gapatchina gita All Meghalaya Minority Students Union (AMMSU), West Garo Hills a·jani Directorate of School Education & Literacy (DSEL)-na sedoataha.
“Rajabala Secondary School, Bhaitbari Secondary School, Jawaharlal Nehru Secondary School, aro Janapriya Secondary School-rangko man·chape West Garo Hills a·jani bang·a deficit skulrangon skigiparangni kamrang bangbang ong·e dongenga ine chinga nikna man·aha. Meghalaya School Service Rule 2025-ni gitade, ia bangbang ong·e dongenggipa skigiparangni kamrangko Meghalaya Education Recruitment Board (MERB)-sa gapatna nanga,” ine AMMSU-ni dilgiparang, DSEL-na sedoatgipa chittio parakataha.
Ia skulrango skigiparang chu·onggijasa class-rangko ra·na nangtokenga ine janapatengon, skigiparang chu·ongjani a·selan chatro chatrirangna lekka porako on·anio neng·nikanirangko chagrongna nangenga aro chatro chatrirangna nangani kri lekka porako on·na man·jaenga ine AMMSU parakataha.
“Ia skulrango qualify ong·gipa skigiparang chu·ongjaengani a·selan chatro chatrirang nangani kri lekka porako skie ra·na man·jaenga aro poraianirango neng·nikanirangko chagrongna nangtokenga. An·chingni bi·sarangna lekka porako on·aniara namen nangchongmotgipa kam ong·a aro skulrango chatro chatrirangna namgipa lekka porako on·na gitade, qualify ong·gipa skigiparangko ra·na nangchongmota,” ine AMMSU parakataha.
