WILLIAMNAGAR: Asanang-oni Samanda-ona dakanggipa ramako name tarijani a·sel ia gital tarigipa rama da·on nosto ong·engaha ine A·chik Organisation for Social Welfare (AOSW), ia ramako tarigipa Midas Construction Company-ni kosako a·dokni PWD (Roads) Minister Prestone Tynsong-na badi ka·doataha.
PWD Minister-na badi ka·e sedoatgipa chittio AOSW-ni parakatani gitade, Asanang-oni Samanda-ona dakanggipa ramako niam gita tarijahani a·sel ramarang da·on nosto ong·na a·bachengengaha aro ian ramako re·ruraenggipa manderangna kenchakna nangani ong·enga.
Ia ramako tarianirang namja ine matnangatengon, ia ramao dolongrang, culvert-rang, retaining wall-rang aro highway guardrail-rangko niam gita tarijaha aro mitam biaprangode tarisranggija donaiaha ine AOSW parakataha.
Ia ramao tarigipa guardrail-rangko rakgijasa a·a nom·ao tariaha ine janapatengon, da·o wachini somoi sokengahani gimin ian re·ruraenggipa manderangna kenchakna nangani ong·enga ine AOSW parakataha.
Ia ramani bang·bata biaprangon retaining wall-rangko tarigija a·arangko cho·ahani a·sel bang·bata biaprangon, mongsongbate West Garo Hills a·jani Rombagre aro East Garo Hills a·jani Rangmalgre jolrango a·arang rurongengaha ine janapatengon, ia biaprango a·arang rurongengani a·selan songni manderangna aro re·ruraenggipa manderangna kenchakna nangani ong·enga ine AOSW parakataha.
AOSW-ni parakatani gitade, je dolongrangkon gital tarina ba te·srena gita nangachim, ia dolongrang bang·batakon name tarijaha aro ian dal·dalgipa garirangnade rakjanaba gnang.
“Ia ramako taria matchotaoni jasamangni gisepon ramarang nosto ong·na a·bachengaha, badiaba badiaba biaprangode a·kolrara dakna a·bachengaha aro a·bri jolrangode a·arang rurongengaha,” ine AOSW parakataha.
