TURA: West Garo Hills a·jani Demdema C&RD Block ning·o, MGNREGA-ni tangka paisarangko jakkalsreta ine matnanganirangko man·ahani gimin iani bidingo sandirokaniko dakchina gita Confederation of Meghalaya Social Organisations (COMSO), West Garo Hills a·jani Deputy Commissioner-na sedoataha.
COMSO-ni parakatani gitade, 2020-2021 aro 2024-2025 bilsini gisepo, Demdema Block ning·o, mongsongbate Bhangarpara aro Bangalkhata songrango, niam gri job card-rangko on·anichi tangka paisarangko bang·en jakkalsretanirang donga ine matnanganirangko knasona man·ahachim.
Mitam nokdangrangna baditaba king job card-rangko on·aha, songni mande ong·gijagipa manderangnaba job card-rangko on·aha aro biming donggijagipa manderangba MGNREGA-ni hajirarangko man·enga ine COMSO matnangataha.
Job card-rangko niam gri on·anio Data Entry Operator Dildar Attaullah Reza aro gipin official-rangba jak donga ine ia manderangni kosako sandirokaniko dakchina gitaba COMSO didiataha.
Mitam biaprangode chonchongipa bi·sarangkoba job card holder-na biming segataha aro hajirarangko tol·e tarigipa Aadhar-rang baksa link ka·gipa account-rango chipataha ine matnangatengon, iandakgipa kamrangara MGNREGA-ni miksonganikon pe·ani ong·enga maina ia scheme-ni miksonganiara songni nokni manderangna kam ka·e cha·na cholrangko on·e kangal cha·a sianiko bon·atanisa ong·a ine COMSO parakataha.
Indake ong·engon, iandakgipa kamrangni bidingo judicial inquiry-ko dakchina, sakkirangko kimitna man·jana gita ia kamrango jak donggipa official-rangko kam dontongatchina, batanggimin bilsi bongana Demdema Block ning·o job card aro hajira on·aniko audit ka·china aro tangka paisa jakkalsretanio jak donggipa pilak manderangni kosako aino pangchake rakgipa sastirangko on·china COMSO dabiangaha.
