TURA: All Meghalaya Muster Roll Workers Union (AMMRPWU)-ni changbrigipa tom·bimonganiko re·anggipa Sonibar salo, West Khasi Hills a·jani Nongstoin-o donggipa Bishop House Hall-o ong·atangaha aro ia tom·bimonganio Meghalaya a·dokni dingtang dingtang biaprangoni sak 200-na baten Muster Roll worker-rang re·bae bak ra·angtokaha.
Ia tom·bimonganio, Muster Roll worker-rangni mongsonggipa dabianirangni gimin chanchirimangengon, union-ni dabianirangko da·onan a·dok sorkari chu·sokate on·kujaengani gimin iani bidingo a·dokni Chief Minister aro Labour Minister-na gisik ra·atpiltaiani chittiko see on·na AMMRPWU-ni membor-rang, tik ka·e donangaha.
AMMRPWU-ni mongsonggipa dabianiara, personnel & administrative reforms (B) department-ni 1996 bilsio on·gipa office memorandum-o pangchake 50% group ‘D’ post-rango muster roll-rangko kamo regularise ka·china, muster roll-rangni man·gniko jaanti on·china, kamo regularise ka·a man·kugijagipa muster roll-rangna Supreme Court-ni dongimin niam ‘Equal Pay for Equal Work’-o pangchake apsan dormahako on·china, dingtang dingtang department-ni muster roll-rangna casual leave, EPF, ESI, bonus aro uandakgiparangko on·china dabianirangan ong·achim.
Ia tom·bimonganio AMMRPWU-ni gital dilgiparangkoba seokangjolaha.
