Tura-o ma·mongni scheme-rangko Union Tribal Affairs Minister nipilanga

TURA: Mongolbar salo, Union Tribal Affairs Minister Jual Oram, West Garo Hills a·jaona re·baenba, ma·mong sorkarini ra·gate on·gipa dingtang dingtang scheme aro program-rangko nipilna gita Tura-ni Circuit House-o dingtang dingtang department-ni officer-rang baksa tom·aniko ong·atangaha.
Salgro salaram jolni dingtang dingtang a·jarangona re·ange ma·mong sorkarini scheme-rangko nipilchina gita a·songni Prime Minister Narendra Modi, ge·etaniko on·ahani gimin ia tom·anikoba PM Modi-ni ge·etanio pangchake ong·ataha aro ia tom·anio, dingtang dingtang department-ni officer-rang bak ra·angtokaha.
Ia tom·anio, Pradhan Mantri Janjati Adivasi Nyaya Maha Abhiyan (PM-JANMAN), Eklavya Model Residential School (EMRS), Tribal Scholarship scheme, aro National Social Assistance Programme (NSAP)-ko man·chape ma·mong sorkarini ra·gatgipa dingtang dingtang scheme-rangko nipilangenba, ia scheme aro program-rangko nambate chu·sokatna Union Minister, ku·pattianirangko on·angaha.
Ma·mong sorkarini ra·gate on·gipa scheme aro program-rangko songadam nokadamrango donggipa manderangona sokatna nangengani giminba ia tom·anio chanchirimangaha.
Pilak biaprangon apsan dake namroro silroroaniko ra·bana ma·mong sorkari on·kange kam ka·enga ine janapatengon, iandakgipa scheme aro program-rangko manderangona sokatanio kamrangko nambate ka·china aro songni nokni manderang baksa agangrikjringchina gita ia tom·anio Union Minister, dingtang dingtang department-ni officer-rangko didiangaha.
Ia tom·anio dingtangmancha, nursing college-ko kulichina dabienggipani giminba chanchirimangaha.
Iana skang Sombar saloba, Union Tribal Affairs Minister Jual Oram, dingtang dingtang songrangona re·ange songni manderang baksa agangrikangaha. Songni manderang baksa agangrikanichisa, ma·mong sorkarini scheme aro program-rang uamangona sokama sokjaenga, uarangko nambate ma·sie ra·na man·a ine Oram aganaha.
Ia salni bako ua, Rongram C&RD Block-ni ning·o Nokrek Area Bee Keeping Cooperative Society Ltd-chi chalaienggipa Chandigre songni Honey Processing Centre-koba niangaha.