SHILLONG: North Eastern Hill University (NEHU) Students Union-ni president Sandy Sohtun-ko rim·anina aro NEHU campus-o sipai dolrangko donatanina Mongolbar salo, NEHU-ni chatro chatrirang jegale, jinma re·jomani aro jinma soi ka·grimaniko ong·atangaha.
NEHU campus-o sipai dolrangko donatani gimin jegale chatro chatrirang, university-ni class-rangkoba ra·na on·gija jingjengatna a·bachengataha.
NEHUSU-ni president-ko rim·anina jegalatengon, uko rim·ani somoio police-rang, ramram gandingkosa ganani gimin niamni a·palo ong·a ine NEHUSU-ni general secretary Toniho Kharsati parakataha.
“Niamko ja·rikgijasa Sohtun-ko rim·ahani gimin chinga iako ra·chakna man·jawa. Police-rang, Sohtun-ko rim·na re·baani somoio ramram ganding chindingrangkosa gana aro police-rangni gandingko ganjahani gimin an·tangtangko police-rangna mesokjaha. Sohtun-ko rim·ani somoio police-rang, chatro sakgipinkoba rim·aha indiba uko ma·sisretesa rim·aha ine uamang Gate V-o gale donangpilaha. Indide iara niam retiko rakkina kam ka·enggipa police-rangni kamma? Chatro chatrirangko rim·e tong·sao gale donangpilaniara maiko mesokaha,” ine Kharsati sing·doataha.
Police-rang, niam retiko rakkigiparangsa ong·ani gimin uamang police department-ni kosako chakatenga ong·ja ine janapatengon, NEHUSU-ni president-ko rim·na re·baani somoio police-rang, an·tangtangni gandingko gangija re·baanisa sing·na nangani ong·ataha ine Kharsati aganenba, police-rangni iandakgipa kamko NEHUSU aro KSU-NEHU Unit raken jegalenga ine parakataha.
DK Basu Case-ni bidingo janapatengon, sakoba rim·na nangon police-rang, an·tangtangna on·gimin ganding chindingrangko ganna nanga ine dongimin niam donga indiba police-rang ia niamko ja·rikjaha ine NEHUSU-ni general secretary matnangataha.
NEHU-ni assistant professor saksako chel·chakna gita sorkari, police aro CRPF-rangko sak 100 batpile NEHU campus-ona watataha ine janapatskaengon, “Da·o dipet ia case-ara matnanganisan ong·kuenga aro police-rang, an·tangtangan iani bidingo sandirokanirangko dakengkua. Unbaksa ia sipai dolrangko, University-ni dilgiparang baksa agangrikchenggijasa donataha,” ine Kharsati parakataha.
“Chinga bakrimaniko on·na kusi ong·aigen aro na·simang, sing·sandianirangko dakna nanggenchimoba chinga bakrimaniko on·aigen indiba iandake university-ona re·bae chatro chatrirangko rim·anikode chinga ra·chakna man·jawa. Sipai dolrangko university ning·o donangkua ong·ode class ra·na on·gija jingjengataniko chinga dontongjawa,” ine NEHUSU mikrakataniko on·angaha.
Adita salrangna skang, North Eastern Hill University (NEHU) Shillong Campus-ni ning·o donggipa Hindi Department-ni Assistant Professor Dr Alok Singh-ko uni office chamber-o kragija dake dokanina NEHU Students Union (NEHUSU)-ni president Sandy Sohtun-ko Sombar salo, police-rang rim·ahachim.
East Khasi Hills a·jani Superintendent of Police (SP) Vivek Syiem-ni u·iatani gitade, ia a·selni bidingo police-rang sing·sandina a·bachengataha aro University-ni assistant professor-ko dokanio jak donggipa pilak manderangkon police-rang rim·nasienga.
