TURA: Mongolbar salo, India sorkarini Information & Broadcasting Ministry-ni ning·o donggipa Central Bureau of Communication, Field Office Tura-ni gita Poshan Pakhwada-ni bidingo Special Publicity program-ko West Garo Hills a·jani Chunmati Community Hall-o ong·atangaha.
Ia program-ko ong·atanio, Tura Urban ICDS-ni Supervisor Vimithara B Sangma, Poshan Pakhwada-ni bidingo talate on·angengon, an·tangtangko an·seng baljoke rakkina gita namgipa cha·anirangko cha·china didianiko on·angaha.
Gital me·su samjakrangko aro bolam biterangko cha·na man·na gita noktangtango me·su baganrangko dakchina gitaba Sangma didiangaha.
Ia program-ko ong·atanio, Field Publicity Assistant Haihungbe Mpame-ba jinmana aganprakengon, namgipa cha·anirangko cha·na nangani gimin aro an·tangtangko an·seng baljoke aro kusi ong·e rakkina gita noktangtango, skulrango, office-rango aro songsaloba rongtal an·talaniko rakkichina didiangaha.
Ia Special Publicity program-ko ong·atani bak gita dingtangmancha bi·sarangna Quiz competition ba sing·anirangna aganchaksusaanikoba ong·ataha aro ia susaanio chegiparangna boksisrangko suale on·angaha. Quiz competition-ko Tura Urban ICDS-ni Supervisor Lubally R Sangma aro Raghini N Sangma dakdilangskaaha.
