TURA: Adita salrangna skang, North Eastern Hill University (NEHU) Shillong Campus-ni Hindi department-o assistant professor ong·e kam ka·enggipa Dr Alok Singh-ko NEHU Students Union (NEHUSU)-ni adita sak chatrorangni kragija dake uni office chamber-o dokahani gimin Garo Hills-ni Niksamso Garo Community Organisation (NGCO) aro A·chik Organisation for Social Welfare (AOSW) dolrangba raken jegalataha.
NEHU-ni saksa skigipako iandake dokahani gimin suk ong·gijaniko parakatengon, iandake skigiparangko chadrapaniara ra·chakna man·gijani ong·a aro skie on·chakram biaprangni rongtalaniko chonnikani gita ong·a ine NGCO aro AOSW dolrang parakataha.
NEHU-ni skigipako iandake chatrorangni dokaniara NEHU Shillong campus-o politics kal·aniko aro niam reti pe·aniko mesokani ong·a ine janapatengon, “Ia a·selo jak donggipa manderangni kosako rakgipa ja·kurangko de·china aro university-o skie on·enggipa aro chatro chatrirangna naljokaniko on·china chinga a·dok sorkari aro University-ni dilgiparangko didienga,” ine NGCO-ni president Tengrak N Marak parakataha.
University-ni skigipako kragija dake dokanina AOSW-ba suk ong·gijaniko parakatengon, ian sastiko man·na kragipa kam ong·a ine matnangataha.
“University ning·ao iandake skigipako kragija dake dokanina chinga raken jegala aro iandake university-rango skigiparangko dokaniara niamko pe·asan ong·aigija skigiparangni mikkimko chonnikani gitaba ong·a,” ine AOSW parakataha.
Ia a·selni bidingo ning·tue sandirokchina dabiangengon, doka man·gipa professor-na AOSW chakpaaniko parakataha.