AMPATI: South West Garo Hills a·jao sagipa manderangko, mongsongbate an·o donggipa me·chikrangko sanna bananio kamrangko nambate ka·na man·na gita Mahendraganj constituency-ni MLA Sanjay A Sangma, 2023-24 aro 2024-25 bilsini Special Rural Works Program (SRWP) scheme-ni ning·o bolsni ambulance-rangko dingtang dingtang songrangna pakwate on·angaha.
Ia ambulance-rangoni snigipako Mongolbar salo, Zikzak C&RD Block-ni ning·o donggipa Garagre songni St Anne’s School-na, Mahendraganj-ni MLA Sanjay A Sangma-ni jakchi pakwate on·angaha.
South West Garo Hills a·jani diltugipa biaprangona sanna bananirangko sokatna man·na gita ia ambulance-rangko Mahendraganj MLA, SRWP scheme-ni ning·o on·gilangaha.
St Anne’s School-na ia ambulance-ko pakwate on·angani somoio Mahendraganj-ni MLA, jinmana aganprakangengon, Boldamgre songoni ong·e, ua chonmitingonin, ambulance-rang dongjani a·sel sagipa manderangko, mongsongbate an·o donggipa me·chikrangko hospital-rangona ra·anio neng·nikanirangko nike, da·alo ia songrango donggipa manderangni namgnina ia ambulance-rangko on·na nangnikaha ine parakataha.
Ia jolrango manderangna sanna bananirangko on·aniosan ong·aigija, ding·karini somoirango manderangni neng·nikanirangko olgrokatna gita dingtang dingtang biaprango waiting shed-rangko aro songo noko re·ruragipa manderangni namgnina rama jal·langrangkoba tarie on·enga ine Sangma aganaha.
“Angni constituency-o namdapatna nanganirang bang·en dongkuenga indiba ia jolrango namroro silroroaniko ra·bana anga kang·kare kae kam ka·enga. Angni chonmitingo anga manderangni neng·nikanirangko nike, manderangna dongtoaniko aro namgnirangko ra·bana gita rake kamko ka·enga,” ine Mahendraganj MLA aganaha.
