Ta·makkuko jegale SWGH-o chatro chatrirang re·joma

AMPATI: World No Tobacco Day 2025-ko maniani bak gita Budbar salo South West Garo Hills a·jani dingtang dingtang skulrango poraienggipa chatro chatrirang, ta·makku jakkalaniko jegale aro ta·makku jakkalani namgijaniko manderangna u·iatna gita jinma re·jomaniko ong·atangaha.
Ia re·jomanio chatro chatrirang aro skigiparang bak ra·angtokenba, Meghalaya a·dokko ta·makku jakkalaoni jakgitel ong·atna, manderangna mikrakatanirangko on·angaha.
Bilsiantian ia World No Tobacco Day-ko May-ni 31 tariko manironga aro uandaken ia bilsioba ia salko maniani bak gita South West Garo Hills a·jani chatro chatrirang, ta·makku jakkalani namgijanirangko manderangna u·iatna ia re·jomaniko ong·atangaha.
Batanggimin bilsi gittamni gisepo, dam 8000-na baten skulrang aro lak 5-na baten chatro chatrirang, World No Tobacco Day-ni dingtang dingtang program-rang, jekai jinma re·jomani, jinma soi ka·ani aro uandakgipa program-rango bak ra·enga.
Ia 2025 bilsioba Meghalaya a·dokni pilak skul aro college-rangon ia World No Tobacco Day-ko maniani bak gita April aro May jarango dingtang dingtang program-rangko ong·atenga.
Ia salo ta·makku jakkalaniko jegale jinma re·jomanio bak ra·ahani gimin dingtang dingtang skulrangko mittelpilangengon, “Ia World No Tobacco Day gita dakgipa program-rango bak ra·anichi an·ching sakantian ta·makku jakkalaniko bon·atanio bak ra·angkuna. Ku·cholsan ong·e kamko ka·anichi an·ching mikkangchi an·senggipa songsalko ong·atna man·gen,” ine South West Garo Hills a·jani Deputy Commissioner Hema Nayak parakataha.