TURA: Meghalaya a·doko niam gri koela bikotaniko National Green Tribunal (NGT)-ni champengatani da·o bilsi 10 batangpilengahaoba niam gri koela bikotanirang bon·changkujaenga ine adita salrangna skang, Enforcement Directorate (ED)-ni gita sandiroke man·aniko parakatani ja·man, a·doko niam gri koela bikotaniko jakgitel ong·gipa agency-rangchi sandirokchina a·doko Opposition dolni dilgipa aro gitcham chief minister Mukul Sangma dabiangaha.
Bristibar salo, Jengjal-o donggipa Sub-Divisional Hospital-ko nina re·angani ja·man kobor ra·timgipa manderang baksa agangrikengon, jakgitel ong·gipa agency-rangchi sandirokgenchimosa, a·doko dilgiparang aro official-rangni, niam gri koela bikotanio jak donganiko parakna man·gen ine Sangma aganaha.
A·doko niam gri koela bikotaniko Enforcement Directorate (ED)-ni gita a·dokni dingtang dingtang biaprangoniko am·sandion, salprako ton 1200-mangni gita koelarangko bikotengkua ine nikna man·ahachim.
Ia am·sandianirangko ED, South Garo Hills a·jani Jadigittim aro Nongalbibra, Bongaigaon-ni Jogighopa, Tinsukia-ni Margherita aro Guwahati koela a·damrangoniko dakangaha aro ED-oni koborko on·ani gitade, South Garo Hills a·jani Jadigittim jolrango skango jakkalgipa turirangchi, niam gri koelarangko bikotengkua aro koela bikotanio, manager-rang, sardar-rang aro labour-rangba jak donga.
“Iandake niam gri koela bikotenggipani bidingo chinga badita chang sorkarina u·iataha na·simang pilakan nikenga. MMDR Act-ni Sec 21A-o ian dosko dakani ong·a aro iako champengani kamde bilo ong·enggipa a·dokni dilgiparangon ong·a. Iarangko champengna gita na·simang permission-ko nangja,” ine Sangma aganaha.
Dingtang dingtang police station-rango badiba chang FIR-rangko ka·aha indiba sorkari aro police-rang iani bidingo maming ja·kurangko de·jaha ineba Opposition dolni dilgipa aganaha.
“ED-ni official-rang South Garo Hills a·jaona re·bae adita salrangni gisepon niam gri koela bikote salruraaniko mesoke on·na man·aha indiba a·dokni police-rang, ia biapon dongkame kamko ka·engoba niam gri koela bikotani sakkirang dongja ine agankuenga. Ian namen kragijani ong·a,” ine Sangma aganaha.
Ia kamrangko bilo ong·enggipa manderangan dakdilenga, uni gimin iani bidingo sandirokna nangchongmota ine Sangma aganaha.