TURA: West Garo Hills a·jao District Selection Committee (DSC)-ni gita dingtang dingtang kamna manderangko seokanio, block hisap ra·china All Selsella NGOs’ Alliance (ASNA), DSC-ni secretary-na sedoataha.
Iani bidingo DSC-ni secretary-na seachi u·iatengon, batanggimin chang DSC-ni gita dingtang dingtang kamrangna kam ka·giparangko seokanio, Selsella Block-ni candidate-rangkode saksakoba ra·jahani a·sel block-ni chadamberang, jemangan kamna qualify ong·a aro kamko man·na kratokachim, suk ong·gijaniko man·tokaha ine ASNA-ni dilgiparang janapatenba, Selsella Block-ba West Garo Hills a·jani bakan ong·e, district level-o kamrangna ra·anio seokako man·pana nanga ine didiataha.
“Selsella-o DSC-ni kamrangna tarisoenggipa skia man·gimin chatro chatrirang bang·en donga, uni gimin da·o changgipin DSC-ni recruitment-ko dakaniode pilak block-ni chadamberangan kamrangko man·pachina gita block-wise kam ka·giparangko seokchina chinga didienga,” ine DSC-ni secretary-na sedoatgipa chittio ASNA-ni dilgiparang parakataha.
DSC-ni kamna seokaniko block-wise dakgenchimode, West Garo Hills a·jani ning·o donggipa block-rang, chong·motan Selsella, Rongram, Dadeng, Tikrikilla, Dalu, Batabari, aro Demdema block-ni chadamberangba kamrangko man·pana gita chol ong·gen ineba All Selsella NGOs’ Alliance parakataha.