Shillong: A·doko ge-50 skulrangko ma·sianganio sorkari kam ka·enga jeon higher secondary skulrangko kulianio class dringrangko on·dapangna class dringrangko rikangna building grant-rangko chamaha, ine Chief Minister Conrad K. Sangma Sonibar salo aganaha.
Higher secondary section-rangko kulina nangchongmotgipao pangchake seokmangipa biaprango sorkari aro private institution ge-2-ona scheme-ko jakkalanggen, ine ua aganaha. Education department-ni gita chu·gimik niamrangko tarina skulon ong·gen, chatro chatrirangni enroll ka·ani, batanggimin bilsirango pass ka·ani percentage aro ugita dakgiparangko nianggen ine ua agandapangaha.
“Seoka man·gipa biaprango skulrang jean sorkarini gita chu·gimik dongimin niamrangko jarikna changsano building grant-na scheme-ko man·a kragipa ong·anggen,” ine ua aganaha. Chatro chatrirang jemangan matric porikkao pass ong·giparang higher education-na cholko man·anggen, ine ja·ku de·ani gimin talatangaha.
Ua ia kattarangko Tura-ni Bidanchi Higher Secondary School-na gitalgipa class dringrangko oprakani somoio aganaha. Chief Minister’s Special Development Fund (CMSDF)-oni dakchakani baksa gital ge-4 class dringrangko rikaha. Ia bilsini academic session-onin higher secondary section-ko kulina skulna lak 10-ko on·dapangaha ine ua parakataha.
CM-IMPACT guide ki·tapko man·chape Class X-na porikkana chatro chatrirangni tarisamsoaniko dilna aro dakchakna bak ra·anganina Education Department-ko de·mittelanganina ua aganaha, “Bilsi anti SSLC poraikkana sak 60,000 chatro chatrirang porikkako sea aro uno komibeoba 25%-ni gitasan pass ong·aia, dingtangmancha songadam biaprang komia. An·ching an·chingni chatro chatrirangni jumangko chu·sokatna man·ja aro ia bilsini result bang·bata chatro chatrirangni porikka sea nambatgipa ong·e namen chu·ongnikataha. Iani bidingo adita jegalgiparangba donga indiba sorkari ong·e aro angni gitade, an·chingni bi·sarangni porikka namaniko nikna man·e anga bilongen kusi ong·aha aro chubata gadangona poraia skianiko ra·angkugen.”
Skul nokrangko rikangna changsan dake on·gipa ong·e lak 50-ona tangka paisachi dakchakaniko on·anggen ine ua u·iataha.
Tura-o skulni on·gilanio aganangaha, batanggimin bilsirango ra·bianirang donggenchimoba songsalna kam ka·angkuchina ua management-ko didiangaha. Bidanchi School-o “Active Learning Centre” gital rikgipakoba ua oprakjolaha.
Mikkangchina invest ka·gipa ong·e chadamberango invest ka·angani bako ua aganaha “An·ching a·songni chadamberang an·chingni dal·batsranggipa bilakani, an·chingni cholrang aro an·chingni ra·bianirang ong·a. Uamangni poraianganio jedakgipa koros ka·anirangan an·chingni a·songna aro a·dokna mikkang invest ka·sogipa ong·enga. India-ni re·mikkanga a·gilsak gimiko superpower ong·e maidake an·chingni chasong gitalni chadamberangko tarianiosa pangchakgen.
Eduction-na rika cho·anio ja·dil ja·pangko namdapatna sorkarini on·kanganiko ua agan-talatangaha aro bi·sa sakantina nambatgipa skia poraianiko on·a ka·dongataha. “Chingni nisan nokrangko rikangasan ong·aija indiba mikkangchinasa rikenga,” ine ua aganaha.
