SHILLONG: Ia bilsini Secondary School Leaving Certificate (SSLC)-ko seanio a·dokni bang·bata chatro chatrirangan chu·sokgipa ong·ahani gimin pass ka·gipa chatro chatrirangna higher secondary skulrango aro college-rango biaprangko on·anio neng·nikanirangko chagrongna nangtokengon, SSLC porikka pass ka·gipa chatro chatri gimiknan higher secondary gadangrango biaprangko tikatna gita sorkari, ia chang dingtangmancha ja·kurangko de·aha ine a·dokni Education Minister Rakkam A Sangma parakataha.
Ia bilsi SSLC porikkako pass ka·anio pass percentage tang·doahani gimin komibeoba sak 12,000-mangni gita chatro chatrirangna, higher secondary skulrango aro college-rango biaprangko nangdapengani a·sel neng·nikanirangko chagrongna nangengachim.
Indake ong·engon, ia neng·nikaniko chel·chakna gita a·dok sorkari, arts, science aro commerce stream-rangko on·dape, dam 723 sorkari skulrangko higher secondary gadangona ra·doataha ine Sangma parakataha. Private skulrangko ra·doatanio, ia bilsimangmangon dam 97 skulrangko higher secondary gadangona ra·dona man·aha ineba ua aganaha.
Higher secondary gadangona ra·doatgimin skulrango da·o chatro chatrirangko rimnapna a·bachengengaha indiba da·o sak 7000-na baten chatro chatrirang, SSLC supplementary porikkako sekuengani gimin ia chatro chatrirangnaba biaprangko tikatskana nangkugen.
Secondary skulrangko higher secondary-ni gadangona ra·doataniara agenda-on dongachim ine janapatengon, National Education Policy (NEP) 2020-ni gitade ia skulrangko iana skangan higher secondary gadangona ra·doatna nangachim ine Education Minister parakataha.
