BAGHMARA: Nongalbibra joloni ia bilsini Secondary School Leaving Certificate (SSLC) porikkao nambate ba percentage bang·bate man·gipa sakgittam chatro chatrirangna Garo Student Union (GSU), Nongalbibra Regional Unit Sonibar salo mande ra·pilskaaniko dakanga. Nongalbibra jolni bang·bate Percentage-ko man·giparangoni skanggipa Nambeasa R Marak (86.33%) St. Francis de Sales Higher Secondary School- ni ong·a. Gnigipa Rongchuang D Shira (83.66%) St. Francis de Sales Higher Secondary School aro gittam-gipa biapo man·gipara Dingrime Marak (79.00%) apsan daken uaban St. Francis de Sales Higher Secondary School-nin ong·a.
Uamangko mande ra·pilskaaniko dakangengon GSU, Nongalbibra Rigional Unit-ni gita uamangna adita tangkarang baksa certificate-rangko on·angjolaha. Ia dingtang man·cha uamangko mande ra·pilskaniko dakna adita tangkarangko on·gilatgipa sakantikon GSU Nongalbibra Rigional Unit-ni General Secretary Salgrak D Shira mittelataha.
