TURA: Robibar salo, Meghalaya Koch Association (MKA), Meghalaya Koch Students Union (MKSU) baksa nangrime, Pabuni Festival-ko South West Garo Hills a·jani Gandhipara songo manidilangaha.
Ia program-ko MKA-ni president Jibanananda Koch dilangaha aro ia Pabuni festival-ko manianio Meghalaya a·dok gimikonin Koch manderang re·bae bak ra·angtokaha.
Ia program-ko ong·atanio, Rangsakona-ni MLA aro Khadi & Village Industries-ni Chairman Subir Marak, mongsonggipa sokgipa ong·e bak ra·angaha.
Ia tom·anio Marak, jinmana aganprakangengon, ia maniani jatna baditaba kingking gamchatgipa ong·achim, uarangni gimin janapangenba, Pabuni Compound-ko taridapna gita gong lak 3 tangkarangko on·gen ine parakataha.
Ia program-ko ong·atanio dongpae ra·anggipa gipin manderangara, Betasing-ni MDC Sanjay Koch aro gitcham MDC Premananda Koch ong·a.
Ia bilsio changprak manigipa Pabuni Puja ba Festival-ara Koch manderangni kusi ong·batsranggipa maniani ong·a ine MKA aro MKSU-ni dilgiparang u·iataha.
Ia manianio songni kamalrang, olakkianirangko dakdilronga. Olakkianio songni manderang, an·tangtangko aro an·tangtangni jilla kaanirangko chel·chakchina gita kamalrangni dilanichi Chokot (chu bitchi) aro Fap (miniko tarigimin cha·ani)-ko uamangni miterangna on·ronga.
Olakkianirang matchotahaon, songni manderang, mongsongbate pante me·trarang, dingtang dingtang doka dam·anirangko doke dam·e chroke mesae ia manianiko matchotata.
