TURA: Re·anggipa Bristibar saloni a·bachenge, ‘Synergy 2025’ inter-college student exchange program-ko salgittamna Tura-ni Don Bosco College of Teacher Education (DBCTE) Hall-o ong·atangaha aro ia program-o Tura-ni damsni college-rang bak ra·angaha.
Ia inter-college student exchange program-ko Tura-ni Don Bosco College ong·ataha aro ia program-ko dingtang dingtang college-rango poraienggipa chatro chatrirangni gisepo meli-nangrimaniko bilakbatatna, an·tangtangni u·i-ma·sianirangko sualgrikna aro saksa sakgipinko didigrikna miksonge ong·ataha.
Ia program-ko West Garo Hills a·jani Deputy Commissioner Vibhor Aggarwal, a·bachengate on·angengon, chadamberangni gisikrangko tarianio iandakgipa program-rangni gamchatgipa ong·ani gimin aganangenba, iandakgipa program-ko a·jani gipin biaprangoba ong·atchina didianiko on·angaha.
Iana skang, Tura Don Bosco College-ni Principal Rev Fr Januarius S Sangma, rimchaksoani kattarangko aganangengon, iandakgipa dingtang dingtang dolrangni apsan tom·e chanchirimanio gamchatgipa ong·aniko talate on·angaha.
Ia program-ko Sonibar salo matchotataha aro ia program-ko matchotatanio, a·dokni Education Minister Rakkam A Sangma, mongsonggipa sokgipa ong·e aganprakangskaengon, curriculum-o on·gimin lesson-rangkosan skie ra·aigija, jatni daka rikani aro a·gilsakni dingtang dingtang kamrango nangchakegipa lesson-rangkoba skie ra·china chatro chatrirangko didiangaha.
Ia program-ko ong·atanio, Education department-ni Advisor HM Shangpliang-ba dongpae jinmana aganprakengon, an·tangni kam ka·anirangko gisik ra·atpilangenba, pangnan dal·e jumang nikgiparang ong·china aro an·tangtangni jumangrangko chu·sokatna gita tikkelchina chatro chatrirangko didiangaha.
