SHILLONG: Mahatma Gandhi National Rural Employment Guarantee Act (MGNREGA)-ara songni nokni manderangna janggi tangani cholrangko on·na ma·mong sorkarini ra·gate on·gipa scheme-sa ong·achim indiba ia sal somoirango sorkariko chalaienggipa manderangni bil jakkalani a·sel, ia niamko pe·e, mitam manderangsan namgnirangko man·skaenga ine Rajabala-ni TMC MLA Dr Mizanur Rahman Kazi matnangataha.
Dr Kazi-ni parakatani gitade, iani sakkiko ia West Garo Hills a·jani Demdem C&RD Block-o nikna man·aha, jeon MGNREGA-ni kamrangko aro hajirarangko man·na nanggipa manderang man·tokjaenga.
“Ia pilakan politics-ni gita jak dongani a·selsa ong·enga aro ian ong·na gita nangjachim. MGNREGA-ara maming politics-ni gita bak donggija, kangal cholgrirangna janggi tangani cholko on·anisa ong·achim indiba ia jolrango politics-ni gita jak dongani a·sel ian ong·chongmotenga,” ine Dr Kazi aganenba, ia scheme-ko ong·gija dake jakkalsretaniara ia scheme-ni miksonganiko pe·ani ong·enga ine parakataha.
“Anga an·tangni constituency-on MGNREGA-ni bang·a kamrango ong·gija dakanirangko nikna man·aha. Manderang angna badi ka·achi u·iataha aro iako anga Demdema block-ni BDO-na watatskaaha,” ine Rajabala MLA aganaha.
Dr Kazi-ni aganani gitade, Demdema block-o bang·a job card holder-rangan MGNREGA niamni ning·o qualify ong·tokja indiba official roll-rangode bimingrang dongtoka.
“MGNREGA-o on·gimin niam gitade, single job card holder-rang dongna man·ja aro sorkari kam donggiparangba job card-rang dongna man·jachim indiba iandake job card donggipa segri ba jikgrirangko aro sorkari kam ka·e job card donggiparangni bimingrangko mesoke on·na man·gen, jeon sak 45 job card holder-rangde niamni a·palo ong·a,” ine Dr Kazi aganaha.
Dr Kazi-ni parakatani gitade, iani bidingo ua BDO-na u·iatahaoba maming ja·kurangko de·na gisik nangjaha.
“Iani bidingo inquiry-ko dakchina aro MGNREGA-ni niamo gita ong·gijagipa job card-rangko den·galchina anga Demdema Block-ni BDO-ko mol·molahachim indiba da·alonan inquiry-koba dakkuja aro maming ja·ku de·anirangkoba nikna man·kuja,” ine Rajabala MLA aganaha.
Iani bidingo ta·raken ja·kurangko de·china gitaba ua a·dokni C&RD Minister-ko mol·molataha.
